Milan, Inter, Real Madrid e Manchester United apo Chelsea janë klubet e mëdha europiane që do të dyluftojnë deri në fund me milionat e tyre, për të arritur deri tek “perlat” e reja që ofron futbolli brazilian.
Siç raporton “La Gazzetta dello Sport”, të gjitha këto skuadra kanë nisur bisedimet me Santosin për talentin e tij më të madh, Paolo Henrique Chagas de Lima, të quajtur shkurt Ganso.
I konsideruar si edhe më i talentuar se sa Kaka, Santosi pretendon plot 54 milion euro që ta lejojë të largohet. Një marrëveshje mund të gjendet për rreth 35-40 milion euro dhe ajo do ta shndërronte Ganso-n në talentin brazilian më të shtrenjtë të historisë.
Ajo që ndërlikon disi bisedimet është fakti që kartoni i tij zotërohet 45% nga Santos, 45% nga një kompani private dhe 10% nga babai i futbollistit. Për të fituar stafetën, klubet mund të detyrohen të përfshijnë edhe Pele-në, një simbol i Santosit dhe një mik familje i Ganso-s.
Një tjetër kampion i së ardhmes është 19-vjeçari Adrian Nicolas Luna, një sulmues i Defensor Sportingut. Uruguajanasi tregoi se zotëron një talent të mrekullueshëm në eliminatoret e Botërorit U-20.
Milani, Juventusi dhe Palermo kanë vendosur ndërkohë kontaktet me futbollistin, vlera e të cilit është më e arsyeshme se sa ajo e Gansos. Megjithatë, mbetet për të parë se cilin kampionat preferon më shumë lojtari mes italianit e spanjollit, ku Atletico e Madridit është veçanërisht e interesuar.
Talenti i tretë më i madh që çmend klubet europiane është qendërsulmuesi i Flamengos, Diego Mauricio “Drogbinha”, një titullar i Brazilit U-20.
Milani besohet se ndodhet përpara në bisedime, pasi Adriano Galliani përfitoi nga takimi me drejtuesit për shitjen e Ronaldinho-s, për të biseduar edhe rreth kartonit të 20-vjeçarit.
Kushton 10 milion euro, por kuqezinjtë duhet të tregohen të shpejtë, pasi edhe shumë skuadra të tjera europiane janë të gatshme të bëjnë çmendurira për të.
Top Channel
