Déjà vu? The Times: Vajza e Brigitte Macron gjen dashurinë me një burrë 20 vjet më të ri

42-vjeçarja ka bërë publike lidhjen e saj me Antoine Lecomte, 22 vjeç, student në një shkollë biznesi në Francën veriore dhe instruktor i sporteve ujore. Mes çiftit ka një diferencë prej 20 vitesh, një detaj që ka sjellë menjëherë krahasime me marrëdhënien e nënës së saj me presidentin francez.

Romanca e tyre dyshohet se nisi në Le Touquet, një qytet bregdetar ku familja Macron ka prej vitesh një shtëpi pushimi. Auzière u njoh me Lecomte pasi mori prej tij mësime për surfboard elektrik, të njohur si eFoil.

Lidhja u bë publike edhe në rrjetet sociale. Të dielën, Auzière publikoi në Instagram një video nga një udhëtim në Amsterdam me Lecomte. Në pamje, çifti shfaqet duke kaluar kohë së bashku dhe duke ndarë një dhomë në Hotel Faralda, një strukturë e pazakontë e ndërtuar mbi një ish-vinç në një kantier të braktisur.

Edhe Lecomte publikoi videon, duke e shoqëruar me mbishkrimin: “48 orë në ditë me zonjën”.

Sipas revistës franceze Gala, Auzière ishte ndarë në maj nga prezantuesi televiziv Cyril Hanouna, me të cilin kishte pasur një lidhje rreth njëvjeçare. Hanouna e kishte angazhuar atë edhe si komentatore të rastësishme në emisionin e tij.

Burime pranë Auzière kanë thënë se diferenca e moshës mes saj dhe Lecomte nuk përbën shqetësim për çiftin.

“Mes tyre ishte një klik i menjëhershëm”, ka deklaruar një mik, duke shtuar se të dy ndajnë pasionin për Le Touquet, udhëtimet, emocionet dhe sipërmarrjen. Lecomte, sipas tij, po zhvillon gjithashtu një kompani që lidhet me pajisjet për kitesurfing.

Një tjetër mike e Auzière e ka krahasuar atë me nënën e saj, duke thënë se të dyja “ndjekin zemrën” dhe nuk shqetësohen shumë për opinionin e të tjerëve.

Tiphaine Auzière, e cila ka dy fëmijë nga një lidhje e mëparshme, ka folur edhe më herët për mënyrën se si marrëdhënia e nënës së saj me Macronin ndikoi në jetën e saj.

Kur Brigitte Macron ishte 38 vjeç dhe jepte mësim drame në një shkollë katolike në Amiens, ajo nisi marrëdhënien me Macronin, i cili ishte ende adoleshent dhe nxënës në atë shkollë.

Në vitin 2024, Auzière e përshkroi këtë periudhë si diçka që e kishte forcuar karakterin e saj. Ajo tha se kishte mësuar të jetonte me vëmendjen publike dhe me komentet e njerëzve.

Ndërkohë, Auzière është shfaqur publikisht në mbështetje të nënës së saj, e cila prej vitesh është objekt i teorive konspirative në internet. Ajo ka dëshmuar edhe në një proces në Paris lidhur me ngacmimet online ndaj Brigitte Macron.

Dhjetë persona u dënuan me dënime me kusht dhe gjoba pasi u shpallën fajtorë për ngacmime në internet ndaj zonjës së parë franceze.

Familja Macron ka ndërmarrë gjithashtu një proces gjyqësor në Shtetet e Bashkuara kundër influencueses Candace Owens, e cila ka përhapur pretendime të rreme dhe teori konspirative për Brigitte Macron. Auzière pritet të dëshmojë në këtë çështje.

Top Channel