Venecia shtron tapetin e kuq, Clooney nderohet për karrierën, festivali hap debatin për Gazën dhe AI-në

Clooney, një prej figurave më të pranishme ndër vite në tapetin e kuq të Venecias, pritet t’i japë shkëlqim festivalit, në një edicion ku shumica e studiove të mëdha të Hollivudit kanë zgjedhur të qëndrojnë larg. Festivali, që vazhdon deri më 12 shtator, hapet me filmin “Ink” të regjisorit Danny Boyle, kushtuar ngritjes së Rupert Murdoch në krye të industrisë mediatike britanike.

Në program përfshihen edhe produksione për Elon Musk dhe rikthimin e grupit Oasis, ndërsa vëllezërit Liam dhe Noel Gallagher pritet të shfaqen në tapetin e kuq. Penelope Cruz dhe Javier Bardem luajnë në trilerin psikologjik “Bunker”, ndërsa John Malkovich dhe Sam Rockwell interpretojnë dy agjentë të pazakontë të CIA-s në filmin “Wild Horse Nine”. Në garën për “Luanin e Artë” është edhe dokumentari “Naza”, që trajton vrasjen e civilëve në Gaza nga forcat izraelite.

Drejtori artistik Alberto Barbera tha se festivali duhet të flasë për konfliktet në Gaza dhe Lindjen e Mesme përmes kinemasë. Një tjetër temë që pritet të dominojë edicionin është inteligjenca artificiale. Për herë të parë, në Venecia do të shfaqet një dokumentar i realizuar tërësisht me këtë teknologji.

“Be Brave”, i regjisorit italian Francesco Carrozzini, rrëfen historinë e themeluesit të markës “Diesel”, Renzo Rosso. Barbera pranoi se inteligjenca artificiale sjell rreziqe për vendet e punës, të drejtat e autorit dhe imazhin e artistëve, por theksoi se ajo u mundëson regjisorëve të realizojnë gjëra që deri tani konsideroheshin të pamundura.

Festivali do të organizojë edhe një simpozium ndërkombëtar për ndikimin e inteligjencës artificiale në industrinë e filmit, ku mes pjesëmarrësve do të jetë edhe George Clooney.

Top Channel