Sulme të reja izraelite në jug të Libanit, goditet ‘infrastruktura terroriste’, një person i vrarë dhe një i plagosur

Sipas agjencisë shtetërore libaneze të lajmeve ANI, forcat izraelite kishin kryer një seri sulmesh në zonë që prej orëve të para të mëngjesit. Përleshjet në zonën përreth kanë qenë intensive prej disa javësh, ndërsa ushtria izraelite vazhdon të mbajë pozicione në pjesë të Libanit jugor dhe po përpiqet të largojë luftëtarët e Hezbollahut nga kodra strategjike Ali Taher.

Nga ana e saj, ushtria izraelite konfirmoi sulmin, duke deklaruar se kishte goditur atë që e cilësoi si “infrastrukturë terroriste”, në përgjigje të drejtpërdrejtë ndaj sulmeve me dronë të Hezbollahut. Sipas Izraelit, organizata e mbështetur nga Irani ka lëshuar çdo natë nga dy dronë sulmues kundër forcave izraelite.

Intensiteti i operacioneve ushtarake ishte ulur ndjeshëm që nga qershori, pas marrëveshjes midis Shteteve të Bashkuara dhe Iranit dhe nënshkrimit të mëvonshëm të një marrëveshjeje kuadër midis Libanit dhe Izraelit.

Megjithatë, shkeljet dhe përplasjet në terren kanë vazhduar, duke shkaktuar viktima. Më 15 gusht, 11 persona u vranë në sulmet izraelite, në atë që u raportua si një nga episodet më vdekjeprurëse të verës. Javën e kaluar, një tjetër grua u vra në sulmet ajrore.

Marrëveshja aktuale parashikon çarmatimin e Hezbollahut, tërheqjen graduale të forcave izraelite nga jugu i Libanit dhe vendosjen e plotë të ushtrisë së rregullt libaneze përgjatë kufirit.

Udhëheqja e Hezbollahut ka kundërshtuar negociatat zyrtare midis Bejrutit dhe Izraelit, të cilat pritet të rifillojnë në shtator, megjithëse ende nuk është përcaktuar një datë e saktë.

Top Channel