Kryetari i Lidhjes Demokratike të Kosovës, Lumir Abdixhiku, ka deklaruar pas mbledhjes së Grupit Parlamentar se gjashtë deputetë të partisë kanë vendosur të mos mbështesin kandidaturën e Bekim Sejdiut për President të Kosovës.
Abdixhiku tha se deputetët nuk kanë pranuar të respektojnë vendimin e Kryesisë së LDK-së, e cila më herët gjatë ditës miratoi marrëveshjen politike dhe mbështeti nominimin e Sejdiut për postin e Presidentit.
Sipas kreut të LDK-së, ky qëndrim rrezikon të shkaktojë pasoja për vendin dhe, sipas tij, mund ta çojë Kosovën drejt zgjedhjeve të reja.
“Me keqardhje, gjashtë deputetë të LDK-së kanë vendosur të mos e respektojnë vendimin e kryesisë së LDK-së. Ata kanë deklaruar se nuk e votojnë kandidatin e propozuar. Konsideroj se shkaktojnë dëm dhe e dërgojnë vendin në zgjedhje.
Avdullah Hoti, Hykmete Bajrami, Janina Ymeri, Armend Zemaj, Kujtim Shala dhe Arben Gashi”, deklaroi Abdixhiku pas mbledhjes së Grupit Parlamentar.
Top Channel
