Shira të rrëmbyeshëm e stuhi në Brazil, 22 viktima, një qytet shpall gjendjen e jashtëzakonshme 24/02 18:28
Katër ushtarë rusë kanë rrëfyer për BBC-në për tmerrin dhe brutalitetin që kanë përjetuar në vijën e frontit në Ukrainë, duke përshkruar ekzekutime të ushtarëve që refuzuan urdhrat dhe tortura sistematike ndaj atyre që nuk morën pjesë në sulme vetëvrasëse.
Njëri prej burrave tha se kishte parë një ushtar të ekzekutohej me urdhër të komandantit të tij, i cili më pas u shpall “Hero i Rusisë” në vitin 2024. Një tjetër ish-ushtar tha se kishte parë komandantin e tij të qëllonte katër burra që refuzuan të merrnin pjesë në sulme. Ai shton: “I njihja. Mbaj mend njërin duke bërtitur ‘Mos qëlloni, do të bëj çdo gjë!’”
Njëri prej burrave tregon gjithashtu se kishte parë 20 trupat e ushtarëve të shtrirë në një gropë, pasi ishin “zerozuar” nga shokët e njësisë. Termi “zero” është zhargon ushtarak rus që përdoret për ekzekutimin e ushtarëve që refuzojnë urdhrat.
Në dokumentarin The Zero Line: Inside Russia’s War, burrat japin rrëfime të detajuara se si ata u torturuan për refuzimin e urdhrave ose për mosmarrjen pjesë në sulmet e përshkruara si ‘stuhi mishi’, ku valë të reja ushtarësh dërgohen në vijën e frontit për të dobësuar forcat ukrainase. Të katër burrat theksojnë se kjo praktikë është e zakonshme dhe se shumica e trupave që refuzojnë përballen me pasoja të tmerrshme dhe çnjerëzore.
Ilya, një prej ish-ushtarëve, tregon se ishte mobilizuar në maj të vitit 2024 dhe dërguar direkt në vijën e frontit me 78 burra të tjerë. Ai thotë se ishte i detyruar të numëronte trupat e vdekur dhe ishte i vetmi i mbijetuar nga njësia e tij. Për shkak të refuzimit për të marrë pjesë në stuhi mishi, ai u torturua rëndë.
Një tjetër ish-ushtar, Dima, përshkruan se kishte parë ushtarë të tjerë të ekzekutoheshin për shkak të refuzimit. Ai shpjegon se komandanti i tij, Alexei Ksenofontov, u shpall “Hero i Rusisë” në vitin 2024, pavarësisht se kishte urdhëruar vrasjen e shumë ushtarëve të njësisë së tij. Dima tha: “Ata mbrojtën atdheun tonë me nder dhe krenari, por në realitet u përballën me bandën e këtyre komandantëve, të cilët morën çmime për dhjetëra mijëra të vdekur dhe të zhdukur!”.
Të katër burrat rrëfejnë gjithashtu se stuhitë e mishit janë valë sulmesh vetëvrasëse, ku trupat e reja dërgohen në vijën e frontit pa pushim dhe me pak ose aspak mbështetje. Disa prej tyre përjetuan vetë tortura dhe dhunë të rëndë, lidhje në pemë, goditje me shkop gome, elektroshok, urinim mbi trup dhe tortura fizike dhe psikologjike për ditë të tëra.
Ish-oficerë të njësive të ndryshme tregojnë se kjo praktikë është bërë pjesë e logjikës operative të ushtrisë ruse, ku fati i një ushtari varej nga komanda dhe mosbindja ndëshkohej me vdekje. Shumë ushtarë që nuk vriteshin për refuzim përballeshin me tortura të vazhdueshme, urinë dhe detyrime për të marrë pjesë në stuhi mishi të paarmatosur.
Dëshmitë e burrave përshkruajnë gjithashtu një prishje të rëndë të ligjit dhe rendit në vijën e frontit, ku trupat ishin të ekspozuar ndaj sulmeve ekstreme dhe ndaj eprorëve që përdornin dhunën dhe vdekjen si mjet frikësimi. Ilya dhe Dima tregojnë se çdo ditë në vitin 2025, rreth 900-1,500 ushtarë rusë u vranë ose u plagosën në Ukrainë, sipas Ministrisë së Mbrojtjes së Mbretërisë së Bashkuar.
Pothuajse i gjithë kundërshtimi publik ndaj pushtimit të Ukrainës nga Presidenti Vladimir Putin është zhdukur në Rusi, dhe shifrat e viktimave nuk janë publikuar nga Moska. Qeveria ruse thotë se forcat e saj “veprojnë me përmbajtje maksimale dhe trajtojnë personelin e tyre me kujdes maksimal”, duke shtuar se çdo informacion mbi shkeljet e dyshuara hetohet.
Të katër burrat që rrëfejnë për BBC-në janë jashtë Rusisë dhe vazhdojnë të përballen me plagë të thella mendore, duke përjetuar makthe dhe trauma të thella për atë që panë në vijën e frontit. Ilya thotë: “E dua vendin tim, por jo atë që Putini i ka bërë atij.” Ndërsa Dima shton: “Në ushtrinë ruse ka shumë njerëz që nuk duan këtë luftë, që i urrejnë komandantët dhe sistemin, dhe ata duhet të na shkatërrojnë.”
Top Channel
