Papa Leoni regjistrohet për të votuar në zgjedhjet afatmesme në SHBA, një rast i paprecedentë në historinë e Vatikanit

71-vjeçari, i lindur me emrin Robert Francis Prevost në Çikago, është regjistruar si votues në shtetin e Illinois dhe ka paraqitur kërkesën për të votuar me postë më 3 tetor.

Lajmi është konfirmuar nga Kim Fladhammer, shefi i stafit të zyrës së sekretarit të qarkut Will, i cili deklaroi për gazetën “Chicago Sun-Times” se Robert Francis Prevost figuron në listën e personave që kanë kërkuar fletë votimi për zgjedhjet e ardhshme.

Sipas autoriteteve, Papa është i regjistruar në adresën e vëllait të tij, në New Lenox, një zonë në jugperëndim të Çikagos. Megjithatë, deri në momentin e raportimit, ai ende nuk e kishte hedhur votën.

Nëse Papa Leoni merr pjesë në këto zgjedhje, kjo do të përbëjë një precedent të paprecedentë, pasi do të ishte hera e parë në historinë 2 000-vjeçare të Kishës Katolike që një Papë në detyrë voton në zgjedhjet e një shteti laik.

Papa Leo XIV u bë në maj të vitit 2025 Papa i parë me origjinë amerikane në historinë e Kishës Katolike. Para zgjedhjes në krye të Vatikanit, ai kishte marrë pjesë në zgjedhjet paraprake të republikanëve dhe demokratëve, si dhe në zgjedhjet presidenciale amerikane të vitit 2024.

Zgjedhjet e këtij viti konsiderohen një test i rëndësishëm politik për administratën e Donald Trump. Në qendër të tyre janë gara për Senatin, pas largimit të senatorit demokrat Dick Durbin, rizgjedhja e guvernatorit të Illinois, JB Pritzker, si dhe përfaqësimi i distriktit të parë të këtij shteti në Kongresin amerikan.

Pjesëmarrja e mundshme e Papës në procesin zgjedhor vjen në një kohë kur marrëdhëniet e tij me presidentin Donald Trump janë shoqëruar me përplasje të hapura publike. Papa Leo ka kritikuar ashpër politikat amerikane për emigracionin, si dhe sulmet ushtarake amerikano-izraelite ndaj Iranit më 28 shkurt. Gjatë një meshe në të Dielën e Larit, në mars, ai e cilësoi bombardimin e Iranit si një akt mizor dhe paralajmëroi se Zoti nuk mund të pranojë lutjet e udhëheqësve që kanë duart të mbushura me gjak.

“Unë nuk kam frikë nga administrata Trump dhe as të flas me zë të lartë për mesazhin e Ungjillit”, deklaroi Papa.

Nga ana tjetër, Trump e ka cilësuar kreun e Kishës Katolike si “të dobët” dhe “të tmerrshëm” në politikën e jashtme, duke e kritikuar edhe për qëndrimet e tij lidhur me armët bërthamore.

Papa Leoni u rrit në Dolton, një zonë pranë Çikagos, ndërsa aktualisht jeton në Vatikan. Sipas legjislacionit amerikan, qytetarët që jetojnë jashtë vendit mund të votojnë me postë në zgjedhjet amerikane, në bazë të ligjit për votimin e shtetasve amerikanë jashtë vendit. Një zhvillim që tërheq vëmendjen ndërkombëtare, pasi Papa Leo XIV mund të bëhet një nga rastet më të veçanta në historinë moderne të papatit: një udhëheqës fetar që, pavarësisht rolit të tij global, vazhdon të ushtrojë të drejtën e votës si qytetar amerikan.

Top Channel