Ka nisur marrja në pyetje e bashkëshortes së Aleks Nikës dhe xhaxhait të të ndjerit, të cilët po japin dëshmitë e tyre para prokurorëve të SPAK.
Fillimisht do të japë dëshminë e saj bashkëshortja e të vrarit më 21 janarit, ndërsa më pas xhaxhai Mark Nika.
Gazetarja Anila Hoxha deklaroi se SPAK fillimisht do të duhet fillimisht të disponojë dëshmi, e më pas do të merret edhe me video-materialin në të cilin jepen urdhrat për veprim ndaj demonstruesve në 21 janar.
“Është shtyrë për pak minuta marrja në pyetje e Mark Nikës, fillimisht do të merret në pyetje gruaja e Nikës. SPAK do të duhet fillimisht të disponojë me dëshmi dhe më pas të pyesë mbi një material audio ku dëgjohet që jepet urdhër për të vepruar ndaj demonstruesve.
Do t’i dërgohet ftesë gazetarit Artan Hoxha. SPAK ka pranuar zyrtarisht që ka regjistruar çështjen në vrasje në rrethana cilësuese. E ka regjistruar pa emrat e funksionarëve të lartë por vetëm me ngjarjen. SPAK përmes një njoftimi i kërkoi Prokurorisë së Tiranës për të tërhequr të gjitha fashikujt”, deklaroi ajo.
Pas një viti kundërshtish gjyqësore nga Rajmonda Nika, bashkëshortja e të ndjerit Aleks Nika, SPAK iu bind Gjykatës së Lartë dhe regjistroi “21 janarin” një ditë më parë.
Pavarësisht se në denoncim përmendet ish-kryeministri Sali Berisha, ish-ministri i brendshëm Lulzim Basha dhe ish-komandanti i gardës Ndrea Prendi, SPAK e regjistroi çështjen pa emrat e tyre.
Në njoftimin për shtyp SPAK thotë se e regjistroi procedimin për vrasje në rrethana cilësuese, shpërdorim detyre në bashkëpunim dhe veprime që pengojnë zbulimin e të vërtetës, pasi siç shton Prokuroria e Posaçme dyshohet se mund të jenë kryer nga ish funksionarë të lartë shtetërore gjatë ushtrimit të detyrës.
Ashtu siç e urdhëron Gjykata e Lartë SPAK deklarohet kompetent për këto hetime, dhe kërkon të tërheqë fashikujt e 21 janarit pranë Prokurorisë së Tiranës për të zbuluar vrasësit e Aleks Nikës.
Si Gjykata e Lartë edhe SPAK përmend vendimin e Gjykatës Europiane që në nëntor 2023 tha se nuk ishte zbardhur përgjegjësia e mundshme e zinxhirit komandues të Gardës.
Në këtë vendim të Strasburgut ku u tregua se shteti kishte dështuar për ta hetuar demonstratën e 21 janarit 2011 thuhet se hetimi ishte ishte përqendruar në përgjegjësinë individuale të oficerëve të Gardës dhe jo në sekuencën apo natyrën e urdhrave që mund të ishin dhënë nga zinxhiri komandues.
Si probleme të tjera u numëruan fshirja e regjistrimeve të incidentit dhe mos ndjekja e pistave kyçe të hetimit si shenjat e plumbave të gjetura në lartësinë e njeriut në gardhin e hekurt që rrethon Kryeministrinë.
Këto mangësi ngritën dyshimin se autoritetet ishin përpjekur ta devijonin apo të ndërhynin në hetim – konsideroi Strasburgu.
Nga vrasja e katër demonstruesve në bulevard drejtësia ka zbardhur vetëm dy prej tyre , të Ziver Veizaj dhe Faik Myrtaj, ndërsa mbeten ende pa autor vrasja e Aleks Nikës dhe Hekuran Dedës.
Por familjarët e katër viktimave kërkojnë që tanimë hetimit të zbulojë edhe funksionarët që urdhëruan për tu qëlluar me armë zjarri.
Top Channel
