Gruaja Bodybulding nga Gjirokastra! Njihuni me nënën e dy fëmijëve zuri vendin e tretë në kampionatin botëror në Holandë

Pa ekip dhe me mundësi të kufizuara për tu stërvitur në nivel profesional ajo ja ka dalë të ushtrohet në palestër për shumë vite dhe kjo krahas punës, familjes dhe dy fëmijëve të saj.

Kampionia ballkanike e bodybuilding natyral vjen së fundi nga kampionati botëror i zhvilluar në Hollandë ku ka merituar vend të tretë, por gjithçka për të nisi si një dëshirë për formë të mirë fizike.

” Unë nuk pata si qëllim të frekuentoj këtë lloj sporti. Unë pata si qëllim të frekuentoj palestrën për një trup më të mirë. Jam e para femër dhe e para sportiste e këtij sporti bodybuilding natyral që kam kartën e profesionistit. Jam shpallur kampione në kampionatin ballkanik të zhvilluar në Boston.

Në çdo garë që kam marrë pjesë kam qenë vetëm ndryshe nga shtetet e tjera që funksionojnë me ekipe, funksionojnë me grupe, shoqërohen nga trajneri, këto gjëra unë i kam pasur të vështira që ti përmbush sepse kam qenë vetëm por ka qenë një ndjesi e jashtëzakonshme që në kampionation e bodybuilding natyral në Opimpia në Las Vegas në USA unë kam ndjerë kënaqësinë më të madhe ku midis flamurit amerikan dhe anglez valëvitej edhe flamuri shqiptar, në tre vendet e para”, deklaroi ajo.

Orjela ushtrohet çdo ditë në palestër angazhim që kërkon shumë disiplinë dhe objektiva të qarta.  I identifikuar si një sport mashkullor më së shumti bodybuilding natyral edhe globalisht ka pak femra që e ndjekin por në Shqipëri për këtë sport është vetëm fillimi.

“Historia tregon që jo shumë femra e ndjekin këtë sport sepse është shumë i vështirë për të pasur rezultate dhe natyra e femrës është e tillë që ka një ndërtim të ndryshëm nga mashkulli. Ky konsiderohet një sport mashkullor por unë nuk e konsideroj të tillë sepse mua më ndihmon të heq çfarë është e tepërt në trup”, u shpreh ajo.

Orjela beson se sporti mund ta fuqizojë njeriun në jetën e tij të përditshme, mund ta bëjë më aftë  për të menaxhuar ditën dhe ka ndikim shumë të mirë në përmirësimin e shëndetit mendor, vetëvlerësimit dhe vetëbesimit.

“Palestra është një kurë shumë e mirë edhe për pjesën psikike, të lehtëson nga streset, nga problemet. Çdo lloj sporti ka vetëm përftime dhe asgjë të keqe. Nëse dikush e ka me dëshirë mund të ndjekë çdo lloj sporti por nëse dikush e ka me dëshirë për të ndjekur bodybuilding natyral larg përdorimit të substancave të ndaluara, larg metodave të shpejta të formimit të trupit kjo është zgjedhja natyrale”, tha ajo.

Sporti që kontribon në ndërtimin e linjave fizike natyrale një disiplinë e lindur bashkë me njerëzimin është ende pak i njohur në Shqipëri. Përpjekjet për ndërtimin e ekipeve të para kërkojnë mjedise, edukim dhe investim tek skuadrat e të rinjve.

Top Channel