Ka mbaruar në Himarë protesta për lirimin nga burgu të kryetarit të zgjedhur të bashkisë Fredi Beleri.
Tubimi u mbajt jashtë zyrës së Omonias në shëtitoren e Spilesë, ku protestuesit kërkuan lirimin e menjëhershëm nga burgu të Belerit.
Në protestën e sotme folësi kryesor ishte kryetari i bashkisë së Athinës Kostas Bakojanis.
Gjatë protestës edhe Belri ka dërguar një mesazh nga burgu ku ka deklaruar se arsyeja e vetme përse ai ndodhet në paraburgim është se ata që po mbajnë bashkinë duan të zaptojnë hapësirat publike e të vjedhin taksat e popullit.
Beleri është shprehur se ata që e mbajnë pas hekurave duan të minojnë bashkëjetesën e komuniteteve të Himarës.
Ndonëse Athina zyrtare ka qenë konstante në qëndrimin e saj politik lidhur me çështjen Beleri, kjo është hera e parë që një kryetar bashkie ndërhyn hapur në çështje të politikës së jashtme të Greqisë.
Ai është djali i ish-ministres së jashtme Dora Bakojani dhe njëkohësisht nip i kryeministrit Qyriakos Mitsotakis.
Në protestë ishin të pranishëm tre kryetarë bashkie i Athinës, Selanikut dhe Korfuzit.
Greqia ka kërkuar lirimin e Fredi Blerit, ndërsa shpesh ka lëshuar dhe tone kërcënuese në drejtim të Shqipërisë me argumentin se po shkelen të drejtat e minoritetit.
Më herët u njoftua një anulim i protestës, por rezultoi i rremë, ndërsa Top Channel ka siguruar edhe përgjigjen e Policisë ndaj sekretarit të partisë “Omonia”, në lidhje me organizimin e protestës.
Top Channel
