Dy persona në Shkodër janë arrestuar pasi janë kapur duke shpërndarë droga të forta të ndara në doza.
Në pranga ranë Ermal Dhampiraj, 42 vjeç, banues në fshatin Shtoj i Ri, Shkodër dhe Samanta Dedushi, 22 vjeçe, banuese në Shkodër.
Makina në të cilën ata po udhëtonin u ndalua nga policia në lagjen “10 Korriku”, Shkodër, të cilën e drejtonte 42-vjeçari dhe e reja ishte pasagjere.
Gjatë kontrollit fizik ndaj tyre dhe kontrollit në automjet është gjetur një sasi lënde e dyshuar narkotike kokainë e ndarë në doza, gati për shitje, si dhe një përforcues grushti (dorezë metalike), të cilat u sekuestruan në cilësinë e provës materiale.
Nga veprimet hetimore dyshohet se këta shtetas shpërndanin droga të forta në doza, në qytetin e Shkodrës. Vijojnë hetimet për dokumentimin e plotë të veprimtarisë kriminale të këtyre shtetasve.
Materialet iu referuan Prokurorisë pranë Gjykatës së Rrethit Gjyqësor Shkodër, për veprime të mëtejshme.
Top Channel
