Lukaku parakalon Neymar-in, bëhet lojtari për të cilin janë shpenzuar më shumë para

Historia e transferimeve të shtrenjta për Lukakun nisi në moshën 18-vjeçare kur kaloi nga Anderlecht te Chelsea për 15 milionë euro. Për të vijuar në 2 shtator të 2013-ës kur gjigandi i sulmit u huazua nga Blutë e Londrës te Everton për 3,5 milionë euro.

Pas paraqitjeve të shkëlqyera që bëri në sezonin e tij të parë me skuadrën nga Goodison Park, Everton vendosi të blejë kartonin e Lukakut për 35,3 milionë euro. Pas 4 viteve te Everton, Lukaku la klubin nga Liverpooli në verën e vitit 2017-të duke u transferuar te Manchester United që shpenzoi 84,7 milionë euro për kartonin e tij. Te Djajtë e Kuq, sulmuesi belg qëndroi vetëm 2 sezone pasi në 8 gusht të 2019-ës firmosi për Interin që derdhi në arkat e Manchester United shifrën 74 milionë eurove përfshirë edhe bonuset.

Sëfundmi Lukaku i dha lamtumirën Interit për t’u rikthyer te Chelsea, klubi që e afirmoi në futbollin e madh. 115 milionë euro ka paguar Chelsea për të blerë kartonin e sulmuesit te Interit, një shumë kjo që e ka çuar shifrën e transferimeve të Lukakut përgjatë gjithë karrierës në vlerën e 327,5 milionë euro. Për Neymar Barcelona shpenzoi 88 milionë euro për ta blerë nga Santosi ndërsa e shiti te Paris Saint Germain për shifrën rekord të 222 milionë eurove me transferimet e Neymar që kapin vlerën totale të 310 milionë eurove.

Për të zbritur brazilianin nga froni ka menduar Lukaku, ndërkohë që podiumi kompletohet nga Cristiano Ronaldo transferimet e të cilit nga Sportingu i Lisbonës te Manchester United, nga Djajtë e Kuq te Reali i Madridit dhe nga Los Blancos te Juventusi që kanë kushtuar në total 228 milionë euro

Top Channel