Cristiano Ronaldo nuk njeh moshë dhe vazhdon të shkruajë historinë. Ylli portugez ka shënuar golin e tij të 979-të në karrierë, duke hapur rrugën e fitores për Al-Nassr në sfidën kundër Abha-s.
Në ndeshjen e javës së 6-të të kampionatit saudit, të zhvilluar të mërkurën në “Al Awwal Park” të Riadit, Al-Nassr mposhti kundërshtarët me rezultatin 2-1. CR7 zhbllokoi sfidën në minutën e 22-të me një goditje të fuqishme me kokë, pas një krosimi nga këndi të ekzekutuar nga Angelo Borges. Sulmuesi 41-vjeçar ishte shumë pranë golit të 980-të përpara fundit të pjesës së parë, por gjuajtja e tij u ndal nga shtylla, ndërsa në një moment të dytë, një tjetër tentativë e portugezit u largua mbi vijën fatale nga mbrojtja kundërshtare.
Pas ndeshjes, Ronaldo reagoi në rrjetet sociale duke postuar një foto nga fitorja me diçiturën: “Puna e palodhur shpërblehet” (“Hard work pays off”). Ky mesazh u interpretua menjëherë nga mediat dhe tifozët si një kundërpërgjigje e tërthortë për lënien e tij jashtë listës së kandidatëve për “Topin e Artë”.
Gara me kohën për objektivin “1000”
Me këtë rrjetë, Ronaldo e çon totalin në 979 gola në karrierë, duke qenë vetëm 21 hapa larg objektivit historik dhe të paimagjinueshëm prej 1000 golash. Vetë portugezi e ka theksuar këtë ambicie në një intervistë të fundit me Rio Ferdinand, duke u shprehur se synon ta arrijë këtë shifër magjike në moshën 41-vjeçare, moshë të cilën e ka aktualisht.
Duke parë ecurinë e tij këtë sezon (3 gola në 6 javët e para të kampionatit me Al-Nassr), ky rekord nuk duket aspak i pamundur. Megjithatë, koha është armiku kryesor, pasi vetë pesë herë fituesi i Topit të Artë ka lënë të kuptohet se ky mund të jetë sezoni i tij i fundit në futbollin e luajtur.
Top Channel
