Qepa e rekordeve “Guinnes” në Shkodër, fermerët e Postribës kultivojnë farën autoktone shqiptare
23/11 19:58
Andrea Gjini, banor i Njësisë Administrative Malbardhë në Kurbin, është ankuar në “Fiks Fare” pasi shtëpia e tij rezulton e regjistruar në Hipotekë si pronën e kushëririt.
Kushëriri i tij, njëkohësisht edhe kufitar, nuk ka asnjë pretendim për këtë pronë. Ai ka bërë disa deklarata noteriale, ku heq dorë nga prona për të cilën është pajisur me certifikatë pronësie nga Zyra e Regjistrimit Kurbin.
Por, Zyra e Regjistrimit Kurbin nuk pranon të bëjë korrigjimin, edhe pse gabimi është bërë nga vet ajo, pas azhornimit që i është bërë zonës.
Gazetarët e “Fiks Fare” ishin në Malbardhë të Kurbinit, ku intervistuan Andrea Gjinin, i cili ka dy vite që sorollatet në dyert e Zyrës së Regjistrimit për të marrë certifikatën e shtëpisë. Ai tregon me gisht kufirin ndarës së banesës së tij dhe tokës së kushëririt. Por, pavarësisht kësaj ndarjeje në terren, me letra ata kanë mbivendosje për rreth 300 m2, sipërfaqe të në cilën ndodhet edhe shtëpia.
“Kam dy vite që sorollatem. Kam marrë deklarata të kushëririt, që heq dorë nga kjo pasuri, pasi nuk është e tij, kjo është tokë e babait. Kam paguar planin tim dhe planin e tij të rilevimit. Por, asnjë nga këto nuk ka ndryshuar qëndrimin e Zyrës së Regjistrimit. Ne nuk kemi asnjë konflikt me njëri-tjetrin”, thotë Andrea.
Vet Andrea Gjini, me një kamer të fshehtë shkoi pranë Zyrës së Regjistrimit, ku takoi një nga punonjësit e kësaj zyre. Ai, pasi e priti dhe i dha shumë të drejtë, i tha se ky është faji i Zyrës së Regjistrimit. Sipas tij, nuk ka ardhur kushëriri i tij, Valentin Gjini, që të kërkojë këtë regjistrim, por e ka bërë vet Zyra e Regjistrimit. Ai pranoi gjithashtu se ky është faj i zyrës dhe jo i topografit që ka bërë planin e rilevimit.
Më pas, ai i kërkoi që kushëriri i tij të shkonte të dorëzonte certifikatën e pronësisë. Por, zotëria (Valentini) këmbëngul se ka shkuar, madje ka paguar edhe udhëtimin e tij nga Greqia. Sipas tij, juristi i zyrës i kishte thënë se, nëse bënte rregullimin, atëherë atij do i hiqej edhe pjesa që i takonte, jo vetëm pjesa ku ka mbivendosje. Për këtë arsye, juristi nuk ia ka mbajtur certifikatën e pronësisë.
Gazetarët e “Fiksit” kërkuan informacion zyrtar pranë Zyrës së Regjistrimit Kurbin, ku intervistuan një nga specialistët e saj. Sipas tij mund të jetë bërë gabim gjatë azhornimit, por nuk e pranon që ky është një gabim i zyrës, ashtu siç bën edhe punonjësi i po asaj zyre në kamerën e fshehtë.
“Ky është një rast të cilin ne e kemi dëgjuar, por nuk i japim dot zgjidhje nëse zotëria, në emër të të cilit është hedhur prona, për të cilën ka marrë certifikatë pronësie, nuk vjen të përcaktojë se nga cila pjesë kërkon të japë dorëheqjen. Ai ka bërë një deklaratë, por aty nuk është e përcaktuar. Ai, ose duhet t’i drejtohet gjykatës, ose duhet të vijë të dorëzojë certifikatën e pronësisë. Ne nuk mund të themi se është bërë gabim nga zyra, pasi është bërë me azhornim”, përfundon specialisti Klevis Berhani.
Pra, për faj të azhornimit, mënyra e vetme që Andrea Gjini të gjejë zgjidhje është t’i drejtohet gjykatës, ose kushëriri i tij Valentin Gjini të dorëzojë certifikatën e pronësisë dhe më pas të ribëhet edhe një herë nga e para e gjithë procedura.
Top Channel
