“Përcjellim një nga figurat dëshmitare dhe një nga më përfaqësuesit të klasës së violinës shqiptare ndër vite, dhe një nga profesorët model të universitetit tonë. Largohet prej nesh ky burrë i urtë dhe ky artist i papërsëritshëm”. Petrit Malaj, Rektori i Universiteti të Arteve.
Familjarë, miq,bashkëpunëtorë, kolegë dhe studentë kanë përcjellë për në banesën e fundit virtuozin e violinës, Ibrahim Madhi, i cili u nda nga jeta një ditë më parë në moshën 69-vjecare.
Për miqtë e tij më të ngushtë ai ka lënë një vend bosh jo vetëm si muzikant i talentuar.
Isak Shehu, pedagog: Ai është themeluesi i traditës dhe i shkollës së interpretimit.
Lorenc Radovani, pedagog: Na mungon një violinist i madh që i përket muzikës, por një burrë i mencur dhe i urtë, kjo është vecantia e madhe që unë nënvizoj, se si muzikant ka shumë për të folur për të.
Kastriot Tusha, tenor: Profesor Bimi, sic kishte mbiemrin, ashtu ishte. Vërtet një njeri i madh.
Homazheve për violinistin e shquar, iu bashkuan edhe politikanët.
Ilir Meta, Kryetar i Kuvendit: Një gjeni i violinës dhe i shkollës së harqeve, një personaliteti i muzikës dhe kulturës tonë.
Lulzim Basha, kryetar i PD: Me punën e tij të palodhur ndër vite, u bë simbol i seriozitetit, integritetit, frymëzimit, të dashurisë për artin për brezat e ardhshëm dhe shpreh bindjen se veprat e tij është përjetësuar.
Profesor Ibrahim Madhi është ngjitur në skenë si solist për herë të parë në moshën 17-vjecare. Më pas punoi si violinë e parë dhe solist në Orkestrat e RTSH-së, Ansamblit Shteteror dhe TKOB.
Ka qenë për vite pedagog, drejtor i Akademisë së Arteve dhe dekan i Fakultetit të Muzikës pranë Akademisë. Në repertorin e tij përfshihen vepra kompozitorësh shqiptarë e të huaj, vepra të luajtura nga Profesor Madhi në Shqipëri e Kosovë, por edhe në shtete të tjera si Itali, Francë, Zvicër, Austri, Gjermani e Kinë.
Top Channel
