Bankat shënojnë bilanc negativ

Deri më tani bankat shqiptare kanë mundur të ruajnë fitime pozitive pavarësisht kushteve të shtrënguara ekonomike dhe presioneve të forta të krizës. Por në tremujorin e tretë të vitit tendenca është përmbysur.
Burime nga Banka e Shqipërisë thonë se shkaqet janë disa, ku më kryesori është ai i kredive të këqija, por edhe ngadalësimi i kreditimit dhe rënia përfitimeve nga interesat e bonove të thesarit. Në tremujorin e tretë kreditë me probleme ishin 24.34 për qind.

Bankat janë të detyruara që kreditë e humbura t’i kompensojnë me fondet e tyre, përmes provigjoneve, duke përkeqësuar rezultatin financiar. Nga ana tjetër stopimi i kredisë për ekonominë, por edhe rënia e interesave të bonove ka tkurrur në tërësi të ardhurat e sektorit financiar.

Por edhe me këtë përkeqësim, shifrat tregojnë se sistemi bankar në tërësi mbetet në gjendjet të shëndoshë financiare. Raporti i mjaftueshmërisë së kapitalit, treguesi kryesor që mat aftësinë e tyre paguese ndodhet në rekordet më të larta historike, rreth 17.8 për qind në tremujorin e tretë, nga 12 për qind që është kufiri ligjor i vendosur nga Banka e Shqipërisë.

Rezultatet e provave që banka qëndrore kryen në mënyrë të vazhdueshme tregojnë se bankat private do të mbeten të shëndosha financiarisht edhe nëse vendi shkon në recesion apo kreditë e këqija rriten më shumë. Prej disa ditësh një grup me dhjetëra ekspertësh nga Banka Botërore dhe Fondi Monetar Ndërkombëtar kanë mbërritur në tiranë po mbikqyrin me hollësi me hollësi situatën e sektorit financiar. Shumë shpejt ata pritet të hartojnë një raport, përmes të cilit do të rekomandojnë dhe masat konkrete për qeverinë, vecanërisht për cështjen e kredive të këqija.
 

Top Channel