Trajneri Delio Rossi rikthehet në qendër të vëmendjes në futbollin italian për gjestet e tij anti-sportive. Këtë herë, tekniku që mori së fundmi drejtimin e Sampdorias, i tregoi gishtin e mesit mbrojtësit të Romës, Burdiso.
Gjesti aspak sportiv u regjistrua në sekondat e fundit të takimit që u fitua nga Sampdoria me rezultatin 3-1. Minutat e fundit të ndeshjes u shoqëruan nga tension i lartë mes futbollistëve në fushë dhe pankinave respektive.
Pak para fërshëllimës përfundimtare, Delio Rossi, i cili pretendon se është ofenduar më parë nga mbrojtësi argjentinas Burdiso, i ka treguar gishtin e mesit këtij të fundit. Gjithcka është dokumentuar me pamje, ndërkohë që ndaj këtij gjesti anti-sportiv, drejtësia e futbollit italian mori masa disiplinore.
Kështu, Delio Rossi pezullohet për dy javët në vazhdim dhe sikur të mos mjaftonte kjo edhe vetë skuadra e Sampdorias e ka gjobitur atë. Gjoba është mirëkuptuar nga tekniku gjaknxehtë që ka thënë se paratë që do t’i hiqen nga paga klubi do t’i ofrojë për bamirësi.
Ky nuk është rasti i parë që Delio Rossi humbet toruan në fushë. Në 2 maj të vitit të kaluar, kur në atë kohë Rossi drejtonte Fiorentinën, u bë protagonist i një zënkë me grushta me futbollistin e tij, serbin Adem Ljajiç dhe gjithcka pas kënaqësisë së shprehur nga ky i fundit për zëvendësimin. Zënka pasoi shkarkimin e trajnerit nga klubi violë.
Top Channel
