Tiranë, nis zhbllokimi i hapësirave publike

Policia bashkiake ka deklaruar se do të pastrohen trotuarët nga subjektet që s’kanë paguar taksat për hapësirat e zëna.

“Aksioni do të zgjasë një javë dhe do të kryhet kryesisht në fundjavë. Ai nisi nga njësitë bashkiake numër 1 dhe 2 dhe më pas do zgjerohet në tërë Tiranën”, ka deklaruar policia bashkiake.

Të djelën e kaluar bashkia e Tiranës paralajmëroi të gjithë personat që tregtojnë produkte të ndryshme në rrugë, por edhe baret që kanë vendosur tavolina në trotuare, se do të marrë masa nëse deri më datën 1 tetor nuk do të lironin këto hapësira publike.

“Bashkia e Tiranës është e vendosur të zbatojë ligjin. Paralajmërojmë tregtarët ambulantë të largohen nga trotuarët, si dhe lokalet që i kanë zënë ato me tavolinat dhe karriget e tyre”, theksoi zëdhënësja e Bashkisë së Tiranës, Anila Bisha.

Në kuadër të operacioneve të saj, bashkia e kryeqytetit mësyu dy javë më parë në parkun “Rinia” për të liruar ambientet e zëna sipas saj në mënyrë të paligjshme për parking nga lokalet.

Madje, drejtori i policisë bashkiake debatoi me menaxherët e kompleksit “Tajvan” që gjendet në zonën e parkut. Ai tha se do të lirohen të gjitha hapësirat e zëna në mënyrë të paligjshme.

Top Channel