Rasti i qytetarit të sëmurë, ministrja Spahiu: E prita dje personalisht në zyrën time, Prania Besnike nuk është vetëm slogan

Në një postim në llogarinë e saj në Facebook, duke publikuar edhe një foto nga takimi me të dhe nënën e tij.

Spahiu thotë se e ka pritur personalisht qytetarin në zyrë dhe se rasti i tij është ndjekur nga strukturat shëndetësore, ndërsa ka sqaruar se ai është referuar për trajtim të mëtejshëm në Turqi.

Ministrja i cilësoi pretendimet e opozitës si të papërputhshme me faktet dhe theksoi se problemet shëndetësore nuk duhet të përdoren për akuza politike.

Postimi i plotë i Klodiana Spahiut:

E vërteta e dyerve të hapura

Qytetari në foto është Albi Sula. Së bashku me nënën e tij, e prita dje personalisht në zyrën time.

E dëgjova me vëmendje për problematikën e tij shëndetësore dhe rrugëtimin e vështirë të trajtimit. Sqaruam hap pas hapi ndjekjen e rastit nga strukturat shëndetësore dhe Ministria e Shëndetësisë dhe Mirëqenies Sociale, si edhe hapat që do të vijojnë.

Përballë disa pretendimeve të bëra publikisht nga opozita, faktet janë të qarta:

Qytetari për të cilin pretendohet se nuk është pritur, ka qenë dje në zyrën time, përballë meje dhe nënës së tij.

Ai është trajtuar dhe ndjekur nga mjekët e Spitalit Onkologjik në QSUT, sipas nevojave dhe protokolleve mjekësore.

Në zbatim të procedurave administrative dhe kontratës me spitalin përkatës, rasti i tij është referuar për ndjekje të mëtejshme në Turqi.

Të bësh politikë është legjitime. Të kritikosh është e drejtë. Por një problem shëndetësor nuk duhet të kthehet në mjet për të ndërtuar një akuzë që nuk përputhet me faktet.

Për mua, përpara çdo debati politik është qytetari dhe halli i tij.

Dyert e Ministrisë së Shëndetësisë dhe Mirëqenies Sociale janë dhe do të mbeten të hapura. Për të dëgjuar, për të sqaruar dhe, aty ku është e mundur, për të gjetur zgjidhje.

Sepse Prania Besnike nuk është slogan. Është përgjegjësi ndaj qytetarit.

Top Channel