Përse i nevojitet Izraeli Turqisë?

Në një konferencë ndërkombëtare të mbajtur ditën e hënë në Turqi, gjenerali turk, Ilker Basbug u shpreh se në 10 ditët e fundit, trupat turke kanë përdorur avionët pa pilotë, “Heron” prodhuar në Izrael, për të vëzhguar territoret, ku veprojnë separatistët kurdë të PKK-së.

Fjalimi i kreut të ushtrisë turke ka ardhur pas një fundjave të përgjakshme në luftimet me rebelët kurdë, ku të paktën 12 ushtarë turq gjetën vdekjen.

Për shumë analistë ndërkombëtare e turq, fakti që Turqia varet ende prej Izraelit në fushën e teknologjisë së lartë ushtarake mund të komplikojë qëndrimin agresiv të Ankarasë ndaj Tel Avivit pas incidentit të flotës humanitare për Gazën, ku gjetën vdekjen 9 aktivistë turq.

E në të vërtetë diplomacia turke vërtet ka tërhequr ambasadorin e saj prej shteti hebre, si dhe anuloi një stërvitje të përbashkët ushtarake mes dy vendeve, por ka treguar një kujdes të veçantë për të mos prishur bashkëpunimin në fushën e industrisë ushtarake, ku asnjë marrëveshje mes dy vendeve nuk është cënuar.

Top Channel