Britani, Camerun do drejtojë qeverinë e re

Negociatorët konservatorë dhe liberal demokratë duket se kanë arritur mes tyre një marrëveshje të cilësuar historike, për të formuar një qeveri koalicioni ku zv/kryeministër pritet të jetë Nick Clegg, udhëheqësi Liberal-Demokratëve. Por janë organet e larta drejtuese të dy partive sëbashku me deputetët ata të cilët do të thonë fjalën e fundit për të miratuar c’farë është rënë dakort mes negociatorëve.

Ndërsa kryeministri Gordon Brown për herë të fundit la “10 Downing Street” mbrëmjen e së martës dhe iu drejtua pallatit mbretëror Buckingham, ku i paraqiti mbretëreshës Elisabeta II dorëheqjen dhe rekomandoi emrin e David Cameron si pasuesin e tij. 40 minuta më pas Camerun sëbashku me bashkëshorten Samanta vizituan Buckingham Palace ku monarkia britanike e mandatoi atë për të formuar qeverinë. Liberal-Demokratët megjithëse dolën të tretët nga zgjedhjet e 6 Majit, ishin vendimtarë me 57 vendet e fituara në parlament për të zgjidhur këtë ngërç politik në Britaninë e Madhe.

Pasi dështuan të gjitha përpjekjet për të formuar një koalicion me Laburistët, u janë dashur më shumë se 5 orë bisedime gjatë ditës së sotme Liberal-Demokratëve dhe konservatorëve për të arritur marrëveshjen e vlerësuar “si deçizive në të mirë të kombit”. Nuk dihen ende teknikalitetet e marrëveshjes por një gjë është e sigurtë se konservatorët kanë bërë lëshime të mëdha pasi nuk kishin asnjë mundësi tjetër përveç bashkëpunimit me Liberal-Demokratët. Atyre u është dashur të plotësojnë një sërë kërkesash të Liberal-Demokratëve ku më kryesoret janë reforma elektorale dhe një qasje më e madhe pro Bashkimit Europian.

Ndërsa Liberal-Demokratët nga ana e tyre kanë rënë dakort të negociojnë me konservatorët duke u tërhequr nga plani për një amnisti nga e cila do të legalizoheshin 1 milionë emigrantë ilegalë. Analistët politikë parashikojnë një sërë problemesh për këtë qeveri koalicioni, të cilat në Britaninë e Madhe nuk e kanë jetën e gjatë nëse do t’i referohemi të së njëjtës përbërje qeverie në vitin 1974. E nëse parashikimet dalin të sakta, atëherë britanikëve do t’u duhet përsëri t’i drejtohen kutive të votimit fillim-vitin e ardhshëm.

Top Channel