Zelensky bën ndryshime në qeveri, shkarkon ministrin e Mbrojtjes pas 6 muajsh në detyrë

Fedorov konfirmoi vetë largimin përmes një postimi në rrjetet sociale, ku tha se kishte qenë “një nder i madh t’i shërbente popullit ukrainas”.

Vendimi për shkarkimin e tij vjen në një moment kur Ukraina po përgatitet për një tjetër dimër të vështirë lufte dhe për sulme të mundshme ruse ndaj infrastrukturës energjetike.

Pas largimit të Fedorov, pritet që në krye të Ministrisë së Mbrojtjes të emërohet Ihor Klymenko, aktualisht ministër i Brendshëm i Ukrainës. Autoritetet nuk kanë dhënë një arsye zyrtare për shkarkimin, ndërsa ende nuk është bërë e ditur nëse Fedorov do të marrë një tjetër post në qeveri.

Fedorov ishte emëruar ministër i Mbrojtjes në janar dhe gjatë mandatit të tij Ukraina ka vijuar përdorimin e teknologjisë së dronëve në luftën kundër Rusisë. Më herët, si ministër i Transformimit Digjital, ai u vlerësua për zgjerimin e përdorimit të dronëve ushtarakë dhe për forcimin e bashkëpunimit me kompani të teknologjisë amerikane. Megjithatë, sipas raportimeve, ai kishte krijuar përplasje me figura të rëndësishme politike dhe ushtarake për përpjekjet e tij për të kufizuar favorizimet në kontratat e mbrojtjes.

Ndryshimet në kabinet erdhën pasi presidenti Zelensky propozoi si kryeministër të ri Sergii Koretskyi, drejtuesin e kompanisë shtetërore të naftës dhe gazit Naftogaz.

Zelensky tha se ndryshimet janë të nevojshme për të përgatitur vendin për dimrin e ardhshëm, veçanërisht pas sulmeve të vazhdueshme ruse ndaj rrjetit energjetik ukrainas. “Prioritetet janë të qarta: përgatitja për dimrin”, deklaroi Zelensky, duke argumentuar se Koretskyi është kandidati më i përshtatshëm për drejtimin e qeverisë në këtë fazë.

Sulmet ruse ndaj centraleve dhe infrastrukturës energjetike gjatë dimrit të kaluar lanë shumë zona të Ukrainës pa energji elektrike dhe ngrohje për periudha të gjata, ndërsa temperaturat ranë deri në minus 20 gradë Celsius.

Ndërkohë, presidenti ukrainas njoftoi se vendi synon të nisë prodhimin e raketave për sistemet amerikane të mbrojtjes ajrore Patriot deri në fund të vitit. Deklarata erdhi pas premtimit të SHBA-së për t’i dhënë Kievit licencë për prodhimin e këtyre raketave.

Megjithatë, ekspertët vlerësojnë se krijimi i një linje të qëndrueshme prodhimi për raketat Patriot mund të kërkojë disa vite.

Largimi i Fedorov dhe ndryshimet në qeveri vijnë në një periudhë kur Ukraina përballet me presion të shtuar nga sulmet ruse. Kombet e Bashkuara kanë raportuar se muaji qershor shënoi numrin më të lartë të viktimave civile nga sulmet ruse që prej prillit 2022, me të paktën 293 civilë të vrarë.

Top Channel