Rruga e Anglisë drejt finales së Kupës së Botës ndryshoi në 14 minuta të çmendura, ndërsa Lionel Messi shpërtheu në lot pasi Argjentina shmangu një tjetër surprizë të madhe të turneut.
Kampionët në fuqi arritën të përmbysin një disavantazh prej dy golash për të mposhtur Egjiptin. Lionel Messi dhe shokët e tij të skuadrës e panë veten shumë pranë një eliminimi në fazën e 1/8-ave, pasi golat e Yasser Ibrahim dhe Mostafa Zico i kishin dhënë “Faraonëve” një avantazh të dyfishtë kur kishin mbetur vetëm 11 minuta nga koha e rregullt.
Por Messi, i cili më herët gjatë ndeshjes kishte humbur një penallti, doli në skenë për të shpëtuar vendin e tij në atë që me gjasë do të jetë Kupa e tij e fundit e Botës, duke frymëzuar një përmbysje mahnitëse. 39-vjeçari ndërtoi aksionin e golit të shënuar nga Cristian Romero i Tottenhamit dhe realizoi me një gjuajtje fantastike fluturimthi për të barazuar shifrat.
Më pas, Enzo Fernandez i Chelseat kompletoi përmbysjen e madhe në kohën shtesë me një goditje të shkëlqyer me kokë, moment i cili ndezi një sherr të ashpër në anë të fushës. Një anëtar i stafit teknik të Egjiptit u ndëshkua me karton të kuq, ndërsa trajneri Hossam Hassan mori karton të verdhë dhe u desh të mbahej për t’u larguar nga zyrtarët e ndeshjes. Ndërkohë, Messi dhe disa shokë të skuadrës u panë të mbytur në lot kur u dëgjua fërshëllima përfundimtare e gjyqtarit.
Për kampionët e botës, kjo është fitorja e dytë radhazi me rezultatin 3-2 në fazën me eliminim direkt, pasi kaluan me vështirësi Kepin e Gjelbër në kohën shtesë.
Çfarë do të thotë kjo për Anglinë?
Ky rezultat ka ndikime të mëdha për Anglinë, e cila është në rrugën e duhur për t’u përballur me Argjentinën në gjysmëfinale, gjithmonë nëse të dyja ekipet arrijnë deri në atë fazë. “Tre Luanët” tani e dinë se do të përballen me një mes Argjentinës, Kolumbisë ose Zvicrës në gjysmëfinale, në rast se arrijnë të mposhtin Norvegjinë.
Top Channel
