![](https://top-channel.tv/wp-content/uploads/2024/09/0-2024-09-07T190138.257-800x450.jpg)
Tensione para Bashkisë së Tiranës, teksa grupi i Rithemelimit ka thirrur protestë.
Dhjetëra qytetarë që i janë bashkuar, së bashku me zyrtarë të opozitës kanë tentuar që të futen në ambientet e brendshme, duke shtyrë kordonin e policisë.
Ata kanë gjuajtur në drejtim të bashkisë me vezë dhe me mollë. Protesta është thirrur pas arrestimit me urdhër të SPAK të disa ish-drejtorëve të kësaj bashkie.
Gjatë fjalës për gazetarët, kreu i grupit parlamentar i PD, Gazment Bardhi u shpreh ndër të tjera se duhet të ketë hetim për çdo bashki.
Ndërkohë që vajza e Sali Berishës, Argita Malltezi, u shfaq në protestë me një foto ku të stampuar kishte foton e të atit, me mesazhin: Lironi liderin e opozitës.
Ndërkohë rreth një orë më pas protestuesit janë larguar, ndërsa këshilltarët e opozitës kanë kërkuar dhe tentuar që të futen në Bashki, por nuk janë lejuar.
Top Channel