Një zjarr i përmasave të mëdha ka përfshirë pasditen e sotme kodrat me ullishte në fshatin Gorishovë, në Fier.
Flakët janë përhapur me shpejtësi në një sipërfaqe të konsiderueshme me shkurre, ullishte dhe masiv pyjor, të favorizuara edhe nga era. Situata ka alarmuar banorët e zonës, ndërsa në terren janë angazhuar forcat zjarrfikëse dhe shërbimet e Policisë.
Sipas informacionit paraprak të Policisë, dyshohet se një 78-vjeçar me inicialet P. M. ka ndezur zjarr për djegien e mbeturinave në tokën e tij. Për shkak të erës, flakët kanë dalë jashtë kontrollit dhe janë përhapur në sipërfaqet përreth, duke përfshirë edhe tokë të mbjellë me ullinj shekullorë.
Zjarrfikësit po vijojnë ndërhyrjen për shuarjen e flakëve, ndërsa terreni i thyer ka vështirësuar operacionin.
Ndërkohë, shërbimet e Policisë kanë shoqëruar 78-vjeçarin në Komisariatin e Policisë Fier, ku po kryhen veprimet e mëtejshme procedurale për zbardhjen e plotë të rrethanave të ngjarjes.
Autoritetet vijojnë monitorimin e situatës, ndërsa puna në terren vazhdon për neutralizimin e vatrave të zjarrit.
Top Channel
