Uran Ferizi, ambasadori i ri shqiptar në Londër, i cili shkoi në ilegalisht me kamion në Angli kur ishte vetëm 17 vjeç, do të punojë me qeverinë britanike për të luftuar kalimin me gomone drejt shtetit ishull.
Revista “The Spectator” e konsideron shembull suksesi dhe personin e duhur për këtë post, pasi ai njeh nga afër problemet e emigrimit të shqiptarëve në Britani, duke qenë se më parë ishte vetë një emigrant.
“Por pse u zgjodh në radhë të parë për të qenë ambasador i Shqipërisë? Pas Oksfordit, Dr Ferizi ishte bankier për një periudhë të shkurtër, përpara se të përfundonte doktoraturën në modelimin mikrostrukturor të trurit në UCL. Më pas ai punoi në shkollat mjekësore të NYU dhe Stanford. Hulumtimi i tij kontribuon në përparimet në diagnostikimin e hershëm të sëmundjeve të tilla si skleroza e shumëfishtë dhe Parkinson, duke përfituar njerëzit jo vetëm në këtë vend, por në mbarë botën.
Këto janë arritje mbresëlënëse, por nuk janë kualifikime të dukshme për të qenë ambasador në Londër. Megjithatë, ato demonstrojnë inteligjencën e fuqishme të Dr Ferizit, që është një kualifikim relevant – siç është zotërimi i tij i përsosur i anglishtes, të cilën ai e flet po aq mirë dhe, në të vërtetë, më mirë se shumë anglezë. Lufta e tij e suksesshme për të arritur në Britani dhe në Oksford dëshmon gjithashtu këmbënguljen dhe vendosmërinë e tij fenomenale, të cilat të dyja janë kritike për suksesin në diplomaci dhe politikë.
Kur Rishi Sunak të takohet me ambasadorin e ardhshëm shqiptar në Londër, kryeministri do të ndeshet me një njeri që njeh nga brenda problemet e emigrimit të shqiptarëve në Britani”, shkruan revista “The Spectator”.
Top Channel
