Broja mungon në stërvitje për një dhimbje në gju, ja si është gjendja e tij

Gjatë ditës së parë të stërvitjes ai ka ndjerë një dhembje në gjurin e tij të rikuperuar tashmë dhe menjëherë ka ndaluar duke evituar ende në këtë ditë të dytë stërvitjen për arsye sigurie. I menjëhershëm ka qenë reagimi i stafit mjekësor i cili ka nxituar t’i bëjë një rezonancë për të kuptuar më tepër situatën.

Rezultati i saj ka qenë pozitiv dhe gjithçka duket të jetë qetësuar edhe pse ai mungoi në këtë seancë të dytë stërvitore.

Një tjetër mungesë në seancën e dytë stërvitore të plotë në Tiranë, ka qenë Keidi Bare gjithashtu i stërvitur në mënyrë të diferencuar duke qenë se edhe ai ka patur disa shqetësime fizike.

Ndërkohë që i vetmi që mungon në këtë grumbullim deri më tani është Klaus Gjasulam i cili ka mbërritur në aeroportin “Nënë Tereza” në orën 17:00 dhe i është bashkuar vetëm sot ekipit, ndërkohë që do të ketë mundësi të zhvillojë vetëm një seancë stërvitore duke e bërë edhe ai thuajse të pamundur aktivizimin.

Ai ka patur një problem shëndetësor për të cilin po kurohet dhe nuk ka qenë në gjendje 100% fizike, për këtë arsye edhe mbërritja e tij ka qenë kaq e vonë.

Një situatë jo shumë edhe të qetë në ekipin kuqezi në këtë prag-ndeshje me disa lëndime që edhe pse të lehta, nuk kanë kaluar pa shqetësimin dhe vëmendjen e duhur. Gjithsesi këto episode nuk kanë ndikuar në atmosferën pozitive që po e karakterizon ekipin tone këto ditë.

Top Channel