Bilanci tragjik i aksidentit më të madh hekurudhor në Greqi ka shkuar tashmë në 47 të vdekur.
Informacione ende të pakonfirmuara zyrtarisht bëjnë me dije se midis personave që konsiderohen të humbur dhe që shumë shpejt do të mund ti shtohen listës makabre të viktimave mund të ketë të paktën edhe 3 shtetas shqiptarë.
Gjatë gjithë natës ekipet e shpëtimit kanë vazhduar të kërkojnë dëshpërimisht mes llamarinave të djegura dhe mbeturinave në vagonat e shkatërruar të trenit të pasagjerërve që është përplasur pak pas mesnatës të së martës me një tren mallrash disa km larg qytetit të Larisës.
Në orët e para të mëngjesit kanë filluar të punojnë edhe vinçat gjigandë që të lëvizin pjesët e dëmtuara sidomos në vagonin e restorantit ku janë gjetur edhe 7 persona të djegur plotësisht.
Të plagosurit janë 57. Midis 6 prej tyre, që vazhdojnë të luftojnë me vdekjen në Repartin e Mjekimit Intensiv të intubuar, janë dy shtetas shqiptarë Roberto Dristi 25 vjeç që ka thyerje në shumë pjesë të trupit dhe Anisa Liuri 23 vjeçe, që kurohet me djegie dhe pritet të dërgohet në një spital të Selanikut më të specifikuar. Shumica e viktimave që nuk janë identifikuar, janë të rinj të moshës 20 deri në 30 vjeç.
Para spitalit në Larisa ku janë dërguar trupat e viktimave vazhdojnë të vijnë prindër dhe të afërm të dëshpëruar pasi nuk mund të gjejnë të dashurit e tyre dhe po i nënshtrohen testit të ADN-së për të identifikuar personat që kanë humbur jetën. Informacione të pakonfirmuara flasin për të paktën 11 persona që konsiderohen të humbur .
Ndërsa vendi ndodhet në ditën e dytë të zisë kombëtare që ka shpallur kryeministri i vendit ,përgjegjësi i stacionit të Larisës që është arrestuar dje dhe që përballet me akuza të rënda deponon sot para prokurorit. Gjithashtu në vendngjarjen e tragjedisë do të kryhet autopsia e aksidentit nga Policia Rrugore e Larisës.
Qeveria greke është zotuar se do të jepen përgjegjësitë për këtë ngjarje fatale dhe ka njoftuar ngritjen e një autoriteti të pavarur që do të shqyrtojë shkaqet e tragjedisë si dhe vonesat kronike të projekteve hekurudhore.
Nga ana e tyre partitë opozitare deklarojnë se kryeministri dhe qeveria e tij po mundohen tja hedhin fajin vetëm një njeriu duke e konsideruar gjithë aksidentin si një gabim njerëzor, ndërkohë që shkaqet janë shumë më të thella dhe e kanë burimin në neglizhenca e gabime shumëvjeçare.
Sa u përket viktimave qeveria greke ka deklaruar se do të marrë përsipër shpenzimet publike të varrimeve të tyre, ndërsa ka ofruar grupe psikologësh pranë familjeve që humbën të dashurit e tyre në këtë aksident.
Në zi të rëndë është edhe komuniteti universitar. Të gjitha universitetet kanë shtyrë aktivitetet e tyre të planifikuara ,ndërsa studentët sensibilizojnë opinionin publik për dhurim gjaku. Në shenjë proteste për aksidentin tragjik përveç Federatës Panhelene Hekurudhave ka shpallur grevë edhe personeli i metrosë në Athinë, ndërsa tubime të reja janë planifikuar pasdite nga sindikata dhe shoqata studentore jashtë zyrave të kompanisë së trenave Hellenic Train në Athinë.
Konsullata e Selanikut: Nga Spitali i Pėrgjithshėm i Larisas Elisia Paço, 18 vjeç. Nga komunikimi i Konsullit të Pėrgjithshëm, z. Arqile Sota me të atin e Elisias, thuhet se ka dëmtime të lehta dhe parashikohet të dalë nga spitali, gjatë ditës së sotme. Nga Spitali Universitar i Larisas Olta Kulla, 20 vjeç me dëmtime relativisht të lehta. Roberto Drizdi, 25 vjeç, ndodhet në reanimacion i intubuar, me dëmtime të rënda (thyerje gjymtyrësh). Anisa (Anastasia) Liuri, 23 vjeç, ndodhet në reanimacion e intubuar, me djegie të rënda (do të transferohet në Spitalin e traumës Papanikolau në Selanik. Maria Dimza, me dëmtime të lehta, ka dalë nga spitali në gjendje të përmirësuar. Të humbur, në pritje të përgjigjes nga ADN që kanë dhënë të afërmit janë Klaudia Lato (Lata), Denis ? Ledio Ruci, Pavlin Bozo. Spitali Genimatas Selanik, të cilët kanë qenë në gjendje të lehtë dhe kanë dalë nga spitali Erisa Almeta, 12 vjeç, Vanesa Plasa, 13 vjeç, Frankli Besaj, 20 vjeç, Dhimitër Zonga.
Top Channel
