Mbi 40 të vrarë nga sulmet pakistaneze në Afganistan, në mesin e viktimave më shumë gra dhe fëmijë 25/12 14:03
Presidenti ukrainas Volodymyr Zelensky ka akuzuar vendet evropiane që vazhdojnë të blejnë naftë ruse se “fitojnë para me gjakun e njerëzve të tjerë”.
Në një intervistë me BBC, Presidenti Zelensky veçoi Gjermaninë dhe Hungarinë, duke i akuzuar ata për bllokimin e përpjekjeve për embargo të shitjeve të energjisë, nga të cilat Rusia do të arrijë në 250 miliardë paund (326 miliardë dollarë) këtë vit.
Ka pasur një zhgënjim në rritje në mesin e udhëheqjes së Ukrainës me Berlinin, i cili ka mbështetur disa sanksione kundër Rusisë, por deri më tani i ka rezistuar thirrjeve për të mbështetur veprime më të ashpra për shitjet e naftës.
“Disa nga miqtë dhe partnerët tanë e kuptojnë se tani është një kohë tjetër, se nuk është më një çështje biznesi dhe parash, po cwshtje mbijetese,” – tha Zelensky për BBC.
Presidenti gjithashtu përsëriti thirrjet për furnizimin me më shumë armë në Ukrainë, duke thënë se ato nuk po i merrnin furnizimet aq shpejt sa duhet për të shmangur sulmin e Rusisë.
“Shtetet e Bashkuara, Mbretëria e Bashkuar, disa vende evropiane – po përpiqen të ndihmojnë dhe po na ndihmojnë,” tha ai. “Por ende ne kemi nevojë për më shpejt, më shpejt dhe më shpejt, kjo është fjala kyçe tani.”
Trupat ruse në javët e fundit janë tërhequr nga kryeqyteti i Ukrainës, Kievi, dhe pjesë të tjera qendrore dhe veriore të vendit – me sa duket duke braktisur një përpjekje për të pushtuar të gjithë Ukrainën.
Por tani ekziston frika e një konflikti të përgjakshëm dhe të zgjatur në lindje dhe jug të vendit, pasi presidenti rus Vladimir Putin e ripërqendron fushatën e tij ushtarake atje në një përpjekje për të pushtuar më shumë territor.
Qyteti port jugor i Mariupolit – një objektiv strategjik për presidentin Putin – tashmë është shkatërruar nga bombardimet e artilerisë ruse me javë të tëra.
Presidenti Zelensky i tha BBC-së se mendonte se dhjetëra mijëra mund të ishin vrarë në qytet.
“Ne kemi gjithashtu informacione se, përveç atyre dhjetëra mijëra të vdekurve, shumë janë zhdukur”, tha ai.
“Ne e dimë se dokumentet e tyre janë zëvendësuar, atyre iu dhanë pasaporta ruse dhe u dërguan në Rusi – disa në kampe, disa në qytete të tjera. Askush nuk e di se çfarë po ndodh me ata njerëz. Askush nuk e di se sa janë vrarë.”
Zelensky tha se mizoritë e kryera me sa duket nga trupat ruse në Mariupol dhe në periferi të Kievit, Bucha dhe Borodyanka, e kishin kufizuar më tej mundësinë e bisedimeve të paqes me rusët.
Ai akuzoi presidentin Putin dhe pjesën tjetër të ushtrisë rue si “kriminelë lufte”.
Top Channel
