Në një lidhje direkte nga Shëngjini ndodhej gazetari i Top Channel, Muhamed Veliu, ku edhe janë strehuar 435 qytetarë afganë nga 644 që kanë mbërritur në total në vendin tonë.
Gazetari afgan ka folur për Top Channel në një dëshmi tepër rrëqethëse për situatën e tmerrshme që ka përjetuar në Kabul. Ai thotë se ai nuk ka asnjë kontakt me familjarët dhe se lutet për jetën e tyre.
“Lash familjen pas në Afganistan edhe kolegët e mi atje. Një prej vëllezërve të mi u arratis për në Pakistan dhe nuk e di ku është dhe për çfarë po bën tani. Njëra nga motrat e mia nuk mund të shkojë në universitet sepse nuk ishte e sigurt në Kabul. Nuk jam në kontakt me familjarët sepse në provincën time nuk ka lidhje interneti. Unë lutem për ta, shpresoj që të jenë të sigurt atje.”, thotë gazetari.
I pyetur për sjelljen e talebanëve në lidhje me gazetaret femra, të cilat nuk po lejohen të ushtrojnë profesionin e tyre atje ai shprehet:
“Ne nuk e dimë se si do të sillen në të ardhmen me gazetaret por ne dimë që në të kaluarën ata kanë vrarë gazetarë, kanë sulmuar media. Në një raport të botuar më tre maj të këtij viti, vetëm brenda 6 muaj gazetarë janë shenjestruar nga persona të armatosur dhe 8 gazetarë u vranë”.
Top Channel
