![](https://top-channel.tv/wp-content/uploads/2024/09/0-2024-09-07T190138.257-800x450.jpg)
Disa persona janë shoqëruar gjatë natës në Elbasan, në lidhje me ekzekutimin mafioz të 41-vjeçarit, Everest Çaka, ngjarje ku mbeti e plagosur në dorë edhe bashkëshortja e tij, Silvana Çaka.
Raportohet se personat janë shoqëruar në cilësinë e dëshmitarit, për të dhënë dëshminë e tyre rreth dinamikës së lëvizjes së viktimës dhe gruas së tyre.
Pistat e hetimit
Një vrasje e stilit mafioz ku të gjitha pistat të çojnë në një larje hesapesh dhe hakmarrje të mundshme. Këto janë dyshimet e para për atentatin bërë Everest Çakajt.
Disa vite më parë vëllai i Everest Çakës u vra në Itali. Në atë kohë u dyshua se autori i vrasjes ishte një person i njohur me pseudonimin Nel Çami. Pas pak kohësh familja Mahmuti, (Familja e Nel Çamit) prej 4 personash u vranë në Elbasan. Ngjarja ndodhi në vitin 2011, i vetmi i shpëtuar Nel Çami rezulton i zhdukur që prej asaj kohe.
Vrasësi u cilësua misterioz, por u dyshua se autor mund të ishte Everest Çaka, në shenjë hakmarrje për vrasjen e vëllait të tij. Dyshime të cilat nuk u faktuan kurrë. Në vrasjen e vitit 2011 mbetën të vrarë 2 vëllezërit e Nel Çamit, babai i tij dhe nusja e shtëpisë. Por kjo duket se nuk do të jetë pista e vetme që do të ndjekë policia.
Vrasja e Everest Çakajt mund të ketë lidhje edhe me vrasjen e djalit të hallës, Arjan Spahiu, i cili u vra në Belgjikë në nëntor të vitit 2020. Spahiu ishte i dyshuar si autor i vrasjes së Gëzim Alikajt disa vite më parë, edhe kjo një ngjarje e mbetur mister.
Ekzekutimi i Spahiut në Belgjikë solli në Elbasan pak ditë më parë një grup hetuesish dhe prokurorësh belg. Hetuesit belg kryen takime me zyrtarë të lartë të Policisë e Prokurorisë për të marrë informacione mbi Arjan Spahiun. Duket se të gjitha pistat rreth vrasjes së 41-vjeçarit në Elbasan të çojnë në larje hesapesh, ndërkohë policia e Prokuroria janë duke vijuar hetimet.
Ngjarja e rëndë ndodhi në lagjen Skënderbej teksa çiftit që udhëtonte me makinë ju bë pritë dhe u qëlluan disa herë. Duket se vrasësi ka pasur shënjestër të saktë përderisa bashkëshortja e Çakajt mori vetëm një plumb në dorë dhe ndodhet jashtë rrezikut për jetën.
Top Channel