EXCLUSIVE/ Australiani zhduket në Theth! Vëllai i të riut intervistë për Top Channel, kërkon ndihmë për gjetjen e 28-vjeçarit 25/11 22:25
Partia Demokratike publikoi dokumentet zyrtare të Autoritetit të Dosjeve, ku prokurori i Krimeve të Rënda, Bujar Sheshi, kandidati i vetëm në dorën e të cilit kishte mbetur ngritja e Këshillit të Lartë të Prokurorisë, figuron të ketë qenë bashkëpunëtor i ish-Sigurimit të Shtetit që në shkollë të mesme.
“Ligji e ka shumë të qartë: një bashkëpunëtor i Sigurimit të Shtetit ndalohet të bëhet pjesë e organeve të reja të drejtësisë”, tha deputeti demokrat Strazimiri.
Por, Bujar Sheshi e ka kaluar sitën e “vetting”-ut pa asnjë pengesë, duke u bërë pjesë e organeve të reja të drejtësisë.
“Arta Marku e kualifikoi atë në kundërshtim me ligjin, në mënyrë që qeveria dhe ajo vet ta shantazhojnë për ta mbajtur nën kontroll. Ajo nuk ka pritur përgjigje nga Autoriteti i Dosjeve, por e ka çuar aplikimin e paplotë pranë organeve të vettingut”, tha më tej Strazimiri.
Demokrati Strazimiri thotë se, e shkuara e Sheshit u bë publike me urdhër të kryeministrit Rama dhe kryeprokurores Marku, për një arsye.
“Shkresa e Autoritetit të Dosjeve mban datën 22 janar, pra një ditë pasi KLP-ja votoi për të kthyer në detyrë dy prokurorët e Krimeve të Rënda, Besim Hajdarmataj dhe Olsian Çela, të shkarkuar në shkelje të ligjit nga Arta Marku. Votimi ka rezultuar 6 me 5 në favor të prokurorëve të shkarkuar, e vota e Bujar Sheshit ka bërë ndryshimin. Prandaj, Arta Marku po qarkullon sot dokumentet kundër Bujar Sheshit, si hakmarrje për mosbindje ndaj urdhrit të partisë dhe shokut Edver”, u shpreh Strazimiri.
Referuar dokumenteve, Bujar Sheshi rezulton në dosjen e ish-Sigurimit të Shtetit se ka punuar hetues në Degën e Punëve të Brendshme të Fierit në vitin 1979, ndërsa pseudonimi i tij ishte “Venusi”.
Top Channel
