Presidencialet në Rumani, sondazhet: Kandidati i Partisë Social-Demokrate udhëheq zgjedhjet 25/11 07:31
Elvis Presley mund të jetë larguar nga skena 4 dekada më parë, por shpirti i tij është i gjallë në Sidnei, ku qindra fansa u bashkuan për një festival në nder të idhullit të tyre.
Të veshur me kostume plot ngjyra dhe, pasi kanë përdorur një pafundësi llaku apo xheli në flokë, sozitë e Elvisit kënduan dhe kërcyen pafund.
Atmosfera e festës ishte e ndezur, një homazh ndaj trashëgimisë kulturore dhe muzikore të “Mbretit”, apeli i të cilit është shtrirë në dekada dhe në breza, duke shkuar përtej rrënjëve të tij amerikane.
“Ai ishte shumë i pashëm dhe unë e adhuroja muzikën e tij, i dashuroja këngët e tij”, tha një grua.
“Kjo na kthen prapa në kohë, atëherë kur ishim duke u rritur, jo fëmijë por adoleshentë. Kjo ishte muzika e kohës sonë”, tha një burrë.
Adhuruesit e shumtë, në stacionin qendror të trenave në Sidnei, u ngjitën mbi dy trena: “Elvis Express” dhe “Blue Suede Express”, që i çojnë ata në qytetin e vogël Parkes, 300 km në perëndim.
Çdo vit, qyteza shndërrohet në një parajsë për fansat e Elvisit, që argëtohen pa fund në një festival 5-ditor. Festivali i nisur në vitin 1993, për të shënuar ditëlindjen e këngëtarit, e ka vendosur madje qytezën e vogël në hartat turistike dhe i ka dhënë atij nofkën “kryeqyteti Elvis” i Australisë.
Top Channel
