“Katalunja do ta shpallë të hënën pavarësinë nga Spanja”. Kështu është shprehur një burim i qeverisë rajonale për “Reuters”. Iberikët, pjesë e Bashkimit Europian, duket se po i afrohen gjithnjë e më shumë shpërbërjes, që kërcënon jo vetëm themelet e demokracisë së saj të re, por edhe tregjet financiare.
“Partitë pro pavarësisë, që kontrollojnë parlamentin rajonal kanë kërkuar mbajtjen e një seance debati dhe votimi ditën e hënë mbi deklaratën e pavarësisë”, thotë më tej burimi. Deklarata pritet të pasojë votimin, edhe pse ende nuk dihet me saktësi se kur do të ndodhë.
Presidenti katalanas, Carles Puigdemont deklaroi më herët për BBC-në se qeveria e tij do t’i kërkonte parlamentit rajonal deklarimin e pavarësisë, pas votimit në referendumin e së dielës, të cilin Madridi e deklaronte dhe e rideklaroi si të paligjshëm, përfshi edhe përmes Mbretit Felipe VI.
“Këto gjëra do të kryhen pasi ne të sigurojmë të gjitha votat e nevojshme brenda fundjavës, e më pas do të veprojmë në fundjavë ose fillim të javës së ardhshme”, tha burimi në fjalë.
Kriza kushtetuese në Spanjë, vendi me ekonominë e katërt më të madhe të Eurozonës, ka tronditur monedhën vendase dhe aksionet e obligacionet e Spanjës, duke rritur ndjeshëm koston e borxhit të Madridit.
E pavarësisht deklaratave për BBC-në, udhëheqësi katalanas pritet të japë një tjetër deklaratë mbrëmjen e sotme në orën 21, plot 24 orë pas fjalimit të Mbretit Felipe VI, pasi një komitet ndërpartiak i parlamentit rajonal të mblidhet për të rënë dakord mbi datën (që me shumë gjasë do të jetë e hëna) për një seancë plenare mbi pavarësinë.
Kryeministri konservator spanjoll, Mariano Rajoy, i cili ka mbajtur një linjë të ashpër ndaj kësaj çështjeje, përballet me një sfidë tejet të madhe për të penguar pavarësinë e katalanasve pa shkaktuar trazira të mëtejshme.
Presidenti i Këshillit të Europës, Donald Tusk e mbështet argumentin kushtetues të tij, por disa europarlamentarë kanë kritikuar ashpër taktikat e tij. Tusk ka apeluar ndaj Rajoyt të gjejë mënyra të tjera për të shmangur përshkallëzimin e situatës në Katalunjë dhe përdorimin e forcës.
Top Channel
