“Fëmijë, suksesi vjen përmes punës”

Fëmijëve të ditëve tona, në sytë e yllit të baletit Tamara Rojo iu mungon disiplina. Balerina kryesore e “English National Ballet” i tha revistës “Times” se, fëmijët shpesh lavdërohen për rezultatet e shpejta, më shumë sesa për atë çfarë përftohet në sajë të një pune të gjatë e të lodhshme.

“Jetojmë në një shoqëri që shpërblen suksesin e rrufeshëm, të mbështetur në fare pak talent apo angazhim, çka e bën përparimin të përkohshëm e plot me rreziqe. Njerëzit duhet të pyesin veten çfarë dëshirojnë, promovimin e triumfeve të çastit dhe dështimeve po aq të shpejta, apo duan të nxisin punën e palodhur dhe vetëbesimin”, tha Tamara Rojo, balerinë kryesore e “English National Ballet”.

Balerina spanjolle, e cila është njëkohësisht edhe drejtoreshë Artistike e kompanisë në fjalë, ka nisur të marrë mësime baleti që në moshën 5 vjeç dhe një trupe i është bashkëngjitur për herë të parë në moshën 11-vjeçare. Rojo e pohon hapur se, suksesin e ka arritur vetëm falë punës së lodhshme dhe këmbënguljes.

“Nuk kam pasur kurrë fleksibilitet natyral apo aftësi të tjera fizike, që gëzojnë persona të caktuar – rrëfen ajo, – por falë një teknike të mirë dhe ushtrimit për 6 orë në ditë që nga mosha 11 vjeç, arrita të siguroj atë lirshmëri lëvizjeje, të cilën natyra nuk ma kishte falur.

Rojo e mori drejtimin e “English National Ballet” në 2013-n, pak përpara se të mbushte 38 vjeç.

Top Channel