Ndarja e re administrative

“Është një reformë mbarëkombëtare që përfshin të gjithë territorin e Shqipërisë, ndaj dhe duhet të jetë një proces gjithëpërfshirës ku të përfshihen të gjithë aktorët. Janë dy rryma: ajo teknike, ku kërkohet zbatimi i reformës; dhe politike, ku duhet të jetë një konsensus dhe një pjesëmarrje e të gjithë aktorëve”, deklaroi Rauning.

“Unë i garantova ambasadorët që kjo është një nga reformat më të rëndësishme dhe i garantova ata për vullnetin e palëkundur të qeverisë, e cila mbetet e hapur për bashkëpunim me opozitën, pasi ajo duhet të jetë pjesë e kësaj reforme”, tha nga ana tjetër ministri Çuçi.

Fino: Të ndryshojë Kushtetuta

Meksi: Të korrigjohet edhe Kodi, të bëhet proporcional kombëtar

Për të njëjtën çeshtje, por në një tjetër aktivitet, bashkëkryetari i komisionit parlamentar për reformën administrative, Bashkim Fino deklaroi se për të duhet të ndërhyet në Kushtetutë.

“Reforma duhet të bëhet me të gjitha partitë, që pak a shumë të mbeten të gjitha të kënaqura, madje edhe minoritetet”, deklaroi Fino.

“Reforma duhet të shoqërohet me ligjin për decentralizimin, ndryshe kot që po e bëjmë”, tha ish-kryeministri Ylli Bufi.

Ndërsa një tjetër ish-kryeminister, Aleksandër Meksi propozoi që për t’i hequr çdo dyshim opozitës se ndarja e re administrative do të përdoret politikisht për zgjedhjet, reforma duhet të shoqërohet me ndërhyrje në ligjin elektoral, për të bërë të paktën rregullimin e sistemit.

“Ne të mos ndërhyjmë në të gjithë ligjin zgjedhor. Të vendoset korrektimi kombëtar për të hequr çdo frikë se do të përdoret ndarja e re e vendit”, deklaroi Meksi.

Reforma administrative, me gjithë ambicjen për t’u përmbyllur brenda këtij sesioni parlamentar, përveç konsultimeve publike vijon të mbetet e bllokuar në Kuvend. Opozita ka refuzuar pjesëmarrjen, duke vendosur si kusht rikthimin e besimit nga ana e mazhorancës te konsesusi me të.

Top Channel