Francë, ligji anti-perçe shkon në Strasburg

Sipas saj, ndalimi i përdorimit të perçes apo llojeve të tjera të shamive islamike përbën një shkelje të të drejtave të njeriut.

Strasburgu nuk ka në dorë të ndërhyjë në legjislacionin e vendeve që kanë pranuar juridiksionin e tij duke ndryshuar ligjin, por mund të vendosë sanksione të rënda mbi Parisin zyrtar nëse do t’i jepet të drejtë paditësit.

Në gjykatë, gruaja që ka dashur të mbetet e paidentifikuar thekson se nuk ka asnjë presion nga familja apo shoqëria e saj për të mbajtur perçen e se është vullneti i saj i lirë që e çoi të ngrinte këtë padi.

Një prej grupimeve kryesore të të drejtave të grave në Francë po lobon për të mbajtur në fuqi ligjin, i cili sipas tyre liron gratë nga presioni i bashkëshortëve apo familjarëve nga imponimi për të respektuar një kod strik veshje.

Franca nxorri të jashtëligjshëm mbajtjen e simboleve fetare në ambientet e dukshme, përfshi kapeles së hebrenjve apo kryqit të vendosur në mënyrë të dukshme tek të krishterët, por ligji ka dëmtuar mbi të gjithë komunitetin mysliman francez.

Në bazë të ligjit, shkelësit e tij dënohen me gjoba deri në 150 euro, ndërsa nëse provohet se gratë janë detyruar të mbajnë perçe, personi përgjegjës mund të përballet deri me tre vjet heqje lirie dhe gjobë prej 30 mijë eurosh.

Franca është vendi europian me komunitetin më të madh musliman brenda tij, pasi 8% e popullsisë franceze deklarohet myslimane.

Top Channel