Meksikani Sergio Perez mendon se mund të shpallet kampion bote në Formulën 1 me McLaren edhe pse me skuderinë britanike pilotë latinë si Fernando Alonso (Spanjë) dhe Juan Pablo Montoya (Kolumbi) kanë pasur probleme.
“Mendoj se çdo sezon ndryshojnë rrethanat dhe ka mundësi që Alonso dhe Montoya të kenë pasur rrethana të papërshtatshme për sukses. Tek McLaren ka pasur pilotë jo britanikë që kanë fituar kampionate. Nuk ka rëndësi kombësia, rëndësi ka që të jenë kushtet për të fituar dhe të kesh një makinë të mirë. Unë kam besim se mund të dal kampion”, theksoi piloti meksikan në një intervistë për ‘AS’.
Perez mendon se rivalët kryesorë të tij dhe Jenson Button do të jenë Red Bull, Ferrari dhe Mercedes.
“Është e vështirë të parashikosh tani, por mendoj se Red Bull, Ferrari dhe Mercedes do të luftojnë për fitoret. Por, këtë gjë do e shohim në provat e para në Australi”, nënvizoi piloti që zëvendëson tek McLaren kampionin Lewis Hamilton.
Top Channel
