Bode: Kompania do paguajë taksa

Po kështu ministria i quan si të papërgjegjshme edhe deklaratat e zotit Rama, se qeveria po transferon miliona euro tek klientët e saj privatë duke u përpjekur të mashtrojë publikun me taksimin e kompanisë 10 përqind.

Sipas ministries, kompania private që do fitojë lotarinë kombëtare do të paguajë  tatim-fitimin në masën 10 përqind,  taksat lokale, Tatim mbi Vlerën e Shtuar për cdo blerje, tatim mbi dividentit, 10 përqind tatim mbi xhiron bruto si dhe është e detyruar t’i kthejë publikut të paktën 50 përqind të xhiros së tij bruto në formën e çmimeve.  

“E ftojme kryetarin e opozitës që të bëjë dhe njëherë llogaritë për të parë nëse do jetë publiku apo buxheti që marrin thuajse 90 përqind të të ardhurave apo kompania”, thuhet në deklaratën e Ministrisë së Financave.

Menjehërë pas kësaj deklarate përmes faqes së tij sociale në Twiter ka reaguar lideri opozitës.

“Zoti Bode na kujtoka se nga grabitja e të drejtës publike për hesap të klientëve të pushtetit, shteti përfitoka TVSH e tatim-fitimi. Jo z. Bode, e drejta e publikut ne Lotarine Kombëtare nuk vlen sa taksat që do paguajnë klientët tuaj pas privatizimit kriminal të saj!, shkruan zoti Rama, duke e etiketuar Ministrin e Financave si qesharak.

Më tej kreu i opozitës vijon duke thënë se Lotaria Kombëtare është një lojë ku publiku merr pjesë jo për të pasuruar klientët e pushtetit, po për të marrë mbrapsht përfitimet prej saj, përfitime të cilat qeveria i investon në jetësimin e politikave publike për artet, sportet, trashëgiminë kulturore, rininë apo cështjet sociale, përfundon kreu i opozitës.

Top Channel