Siri, Assad viziton Homsin

Vizita mbërrin në një moment kur Damasku zyrtar ka pranuar planin e të dërguarit të Kombeve të Bashkuara, Kofi Anan për pushimin e luftimeve mes forcave rebele dhe atyre qeveritare dhe rivendosjen e paqes në vend.

Qyteti, që deri para pak ditësh ishte nën rrebeshin e artilerisë ushtarake qeveritare, ishte i blinduar nga forca të shumta sigurie. Presidenti sirian, Assad u ndal edhe tek lagjja Baba Amër, lagjja kryeqendër e kryengritjes popullore kundër qeverisë ku dhe u regjistruan viktimat më të mëdha të rebelimit disa-mujor.

Analistët ndërkombëtarë e quajnë vizitën e Assad si një skenar që ka dashur të përcjellë mesazhin e triumfit të presidentit sirian ndaj rebelëve dhe që tregon qartë forcimin e pozitave të tij në krye të Sirisë.

Por a është kjo një shenjë e dështimit të revolucionit në Siri? Me shumë gjasa po. Plani i OKB-së për të rivendosur paqen në vend, që përbëhet nga gjashtë pika, nuk kërkon largimin e Assad nga pushteti apo mbajtjen e zgjedhjeve, por një pikë e rëndësishme është pika gjashtë e planit ku edhe mund të mbështeten forcat opozitare anti-Assad.

Por cfarë përmban ky plan? 1) Proces politik për të adresuar aspiratat dhe shqetësimet e popullit sirian, 2) Fundin e dhunës së armatosur në të gjitha format, nga të gjitha palët, për të mbrojtur civilët, 3) Të gjitha palët të garantojnë kushtet për ndihmën humanitare në të gjithë zonat e prekura nga konflikti, 4) Autoritetet të intensifikojnë ritmin dhe shkallën e lirimit të personave që janë burgosur në mënyrë arbitrare, 5) Autoritetet të garantojnë lirinë e lëvizjes në të gjithë vendin për gazetarët dhe 6) Autoritetet të respektojnë lirinë e grumbullimeve dhe të drejtën për të protestuar në mënyrë paqësore.

Top Channel