SHBA vlerësojnë zhvillimet politike

Në një deklaratë për mediat, ambasada thotë se, mirëpret hapat fillestarë të Kuvendit drejt trajtimit të reformave kritike të rekomanduara nga BE dhe OSBE.

Selia diplomatike e vë në veçanti theksin tek ngritja e një komisioni ad-hoc për reformën zgjedhore, si dhe tek miratimi i dy ligjeve që kërkonin një shumicë të cilësuar.

Ambasada e SHBA në Tiranë thekson në deklaratën e saj se, këto hapa “pozitivë” duhet të vazhdohen edhe në të ardhmen.

Deklarata mbyllet me nxitjen që kjo ambasadë i bën të gjithë udhëheqësve politikë, që të vazhdojnë të punojnë së bashku për të ruajtur këtë hov pozitiv.

Mirëkuptimi u përshëndet një ditë më parë edhe nga kreu i prezencës së OSBE-së Eugen Wollfarth, i cili në një deklaratë për shtyp vlerësoi se, “ky është një fillim inkurajues”.

Edhe ambasadori i Bashkimit Evropian, Ettore Sequi përshëndeti konsensusin, duke theksuar se, “rruga drejt Evropës është një rrugë që ndërtohet mbi bashkëpunimin dhe konsensusi është një rrugë që bazohet në dialog”.

Gjithashtu, ngritja e komisionit parlamentar mbi reformën zgjedhore dhe votimi i dy ligjeve me tre të pestat u mirëprit nga komisioneri për Zgjerimin, Shtefan Fyle.

Top Channel