Shoqatat e biznesit në Serbi kanë kërkuar sot nga Bashkimi Evropian që ta anulojë vendimin e qeverisë kosovare për ndalimin e mallrave që hyjnë nga Serbia në Kosovë.
Në këtë apel janë përfshirë Dhoma Serbe e Tregtisë, Këshilli për Investitorët e Huaj, Dhoma Amerikane e Tregtisë dhe klubi “Biznesmeni”.
Në një letër të hapur drejtuar komisionerit për Zgjerimin, Shtefan Fyle, shoqatat e biznesit shprehen se, Kosova me këtë masë po shkel marëveshjen e CEFTA-s.
“Ju drejtohemi juve dhe institucioneve të tjera përgjegjëse evropiane, që në mënyrë urgjente të aktivizohen të gjithë mekanizmat për të anuluar vendimin për ndalimin e hyrjes së mallrave nga Serbia”, thuhet në letrën e dërguar, të transmetuar nga mediat serbe.
Qeveria e Kosovës mori këtë masë javën e kaluar, duke qenë se prej më shumë se dy vjetësh Serbia nuk njeh vulat e doganës së Kosovës dhe për rrjedhojë mallrat e saj nuk mund të hyjnë në shtetin serb.
Top Channel
