Iu gjetën rreth 22 mijë euro dhe bizhuteri me vlerë, arrestohet anëtari i bandës në Greqi që mashtronte të moshuarat

Sipas policisë greke, aktiviteti i bandës u zbulua pas dy rasteve mashtrimi në Selanik dhe Trikala, nga të cilat autorët vodhën gjithsej 21,200 euro, 46 paund ari dhe bizhuteri me vlerë rreth 60,000 euro.

Ndërhyrja e menjëhershme e oficerëve të DAOE-së ishte vendimtare. Anëtari i dyshuar u identifikua dhe u arrestua, ndërsa të gjitha paratë dhe sendet me vlerë u sekuestruan dhe iu kthyen dy grave të moshuara, viktima të mashtrimit.

“Një shtetas i huaj u arrestua në orët e para të mëngjesit të sotëm, të mërkurën, 4 nëntor 2026, në Selanik, i cili dyshohet se është anëtar i organizatës. Sipas hetimit, i arrestuari së bashku me të paktën dy persona të tjerë të panjohur kishin formuar organizatë kriminale me qëllim përfitim financiar të paligjshëm përmes mashtrimit të të moshuarve”, deklaroi policia.

Sipas mediave të huaja, anëtarët bënin telefonata duke pretenduar në mënyrë të rreme se një i afërm i viktimës ishte përfshirë në një çështje me autoritetet. Më pas bëhej një telefonatë e dytë, ku një anëtar tjetër shtirej si oficer policie, duke përforcuar klimën e frikës. Në këtë mënyrë i bindnin viktimat të dorëzonin para, bizhuteri dhe sende të tjera me vlerë.

Autorët pas komunikimeve telefonike bindën një grua të moshuar të vendoste në një qese dhe ta linte nën një kosh plehrash jashtë shtëpisë së saj shumën prej 5,300 eurosh dhe bizhuteri, të cilat më pas i morën.

Me të njëjtën metodë, bindën një grua të moshuar të vendoste në një qese shumën prej 15,900 eurosh, 46 paund ari dhe bizhuteri të ndryshme me vlerë totale rreth 60,000 euro. Më pas, duke ndjekur udhëzimet e tyre, ajo ia dorëzoi çantën një shoferi taksie, i cili pa ditur përmbajtjen e transportoi në Selanik për t’ia dorëzuar personit të arrestuar.

Falë shfrytëzimit të menjëhershëm të të dhënave dhe veprimeve të koordinuara të oficerëve të Zyrës së Krimeve Kundër Pronës, i akuzuari u gjet dhe u arrestua në Selanik.

Gjatë kontrollit iu gjetën dhe iu konfiskuan të gjitha paratë dhe sendet me vlerë të dy rasteve, si dhe dy telefona celularë.

Paratë dhe sendet iu kthyen pronareve, ndërsa ndaj personit të arrestuar është ngritur çështje penale për organizim kriminal dhe mashtrim dhe do të çohet para organit kompetent të ndjekjes penale.

Top Channel