Christophe Dugarry ka reaguar ashpër ndaj Kylian Mbappé, pas deklaratës së sulmuesit francez se dëshiron të fitojë Topin e Artë.
Ish-lojtari i kombëtares së Francës nuk e ka pritur aspak mirë mënyrën se si Mbappé ka shprehur publikisht ambicien për çmimin individual, duke e konsideruar këtë sjellje të papërshtatshme, sidomos për një futbollist që mban shiritin e kapitenit të Francës.
“Të kërkosh publikisht një çmim individual si ky, mua më duket fëmijërore dhe patetike. Nuk ka asgjë madhështore në të kërkuarit e tij, sidomos kur je kapiten i kombëtares tënde”, deklaroi Dugarry. Ish-kampioni i botës më pas e zgjeroi kritikën e tij, duke e lidhur me një problem më të madh që, sipas tij, po prek futbollin modern.
“Futbolli po bëhet gjithnjë e më individualist dhe shumë shpesh kjo më bën të ndihem keq. Në vend që të flasësh për veten dhe për çmime individuale, duhet të flasësh për ekipin, për të ndarë suksesin dhe për trofetë që nuk i fitove, por që doje t’i fitoje së bashku me ekipin”, shtoi Dugarry. Një kritikë e drejtpërdrejtë për Mbappé, i cili prej vitesh konsiderohet një nga favoritët për të fituar trofeun individual më prestigjioz të futbollit. Për Dugarry-n, megjithatë, një kapiten duhet të vendosë gjithmonë ekipin përpara ambicieve personale.
Top Channel
