Garat evropiane kanë rifilluar dhe bashkë me to është rikthyer edhe beteja për dy vendet shtesë në Ligën e Kampionëve.
Në fund të sezonit, dy kampionatet që do të grumbullojnë më shumë pikë në renditjen e koeficientëve të UEFA-s do të përfitojnë nga një biletë shtesë për edicionin e ardhshëm të kompeticionit më prestigjioz për klube. Në sezonin 2023/24, këtë privilegj e siguroi Italia, ndërsa sezonin e kaluar ishin Anglia dhe Spanja ato që triumfuan në këtë garë, falë rezultateve të shkëlqyera të klubeve të tyre në kompeticionet evropiane.
Renditja e UEFA-s bazohet në rezultatet e arritura nga klubet e secilit shtet në Champions League, Europa League dhe Conference League. Për çdo fitore jepen 2 pikë, ndërsa për barazimin 1 pikë. Në llogaritje përfshihen edhe pikët bonus që klubet marrin për ecurinë në fazat e ndryshme të kompeticioneve.
Totali i pikëve të grumbulluara nga klubet e një vendi pjesëtohet me numrin e skuadrave që e përfaqësojnë atë në garat evropiane. Në këtë mënyrë përcaktohet koeficienti mesatar i secilit kampionat. Në përfundim të sezonit, dy vendet e para në këtë renditje sigurojnë nga një përfaqësues shtesë në Champions League për sezonin pasardhës.
Pas ndeshjeve të zhvilluara deri më tani, Anglia mban vendin e parë me 9.166 pikë, e ndjekur nga Portugalia dhe Belgjika, që përbëjnë dy surprizat e këtij fillimsezoni. Italia renditet vetëm në vendin e tetë me 7.500 pikë, ndërsa Spanja mban vendin e gjashtë. Megjithatë, diferencat janë të vogla dhe renditja pritet të ndryshojë ndjeshëm në vazhdim të sezonit.
Ja 10 kampionatet kryesuese:
| Vendi | Shteti | Pikët | Ekipe |
|---|---|---|---|
| 1 | Anglia | 9.166 | 9/9 |
| 2 | Portugalia | 8.500 | 5/5 |
| 3 | Belgjika | 8.400 | 5/5 |
| 4 | Gjermania | 8.285 | 7/7 |
| 5 | Turqia | 7.900 | 4/5 |
| 6 | Spanja | 7.875 | 8/8 |
| 7 | Holanda | 7.666 | 6/6 |
| 8 | Italia | 7.500 | 7/7 |
| 9 | Norvegjia | 7.400 | 4/5 |
| 10 | Franca | 7.214 | 7/7 |
Top Channel
