Lautaro ndez sfidën me Realin: Nuk kemi ardhur për t’u dorëzuar

Kapiteni zikaltër, Lautaro Martinez, e pret me shumë besim sfidën ndaj skuadrës së José Mourinhos.

Argjentinasi e pranon nivelin e lartë të madrilenëve, por paralajmëron se Interi nuk shkon në Madrid për të qenë spektator. “Po përballemi me një ekip të klasit të parë, por ne kemi armët tona. Po rritemi si grup dhe si ekip. Është e rëndësishme të luajmë ndeshjen më të mirë të mundshme. Jemi përgatitur në mënyrën më të mirë dhe jemi gati”, deklaroi Lautaro. Kapiteni zikaltër foli edhe për Kylian Mbappén, të cilin e konsideron një prej futbollistëve më të mirë në botë.

“Mbappé është një nga më të mirët në botë”, u shpreh ai. Lautaro nuk e fshehu dëshirën për të bërë një paraqitje të madhe dhe për ta çuar Interin sa më larg në kompeticionin më prestigjioz të klubeve. “Vitin e kaluar u eliminuam herët, por çdo vit është i rëndësishëm për t’u rritur dhe për të mësuar. Pres të bëj më të mirën time dhe ta çoj Interin sa më lart të jetë e mundur”, tha sulmuesi. Sa i përket objektivit në Champions, Lautaro është i qartë: trofeu është një synim, por jo një obsesion.

“Është një objektiv, jo një obsesion. Të gjithë mund të ëndërrojnë, por duhet të kemi gjithmonë mentalitetin e duhur dhe dëshirën për t’i sjellë trofe Interit”, theksoi kapiteni. Në fund, ai vlerësoi edhe fitoren ndaj Napolit në kampionat, duke nënvizuar se Interi ka ende shumë punë përpara. “Puna në grup është ajo që ka rëndësi. Mundëm një ekip të fortë si Napoli, por kemi ende shumë rrugë për të bërë”, përfundoi Lautaro.

Top Channel