Raporti i Federatës Angleze do të përfshijë përfundime mbi taktikat në gjysmëfinale, përzgjedhjen e skuadrës dhe madje edhe zgjedhjen e bazës së ekipit.
Thomas Tuchel i është nënshtruar javën e kaluar një analize intensive të aventurës së Anglisë në Kupën e Botës, ndërsa stafi i Federatës Angleze të Futbollit po përgatit një raport të gjerë mbi dështimet dhe sukseset e kombëtares gjatë turneut.
Përfundimet mbi taktikat dhe përzgjedhjen e lojtarëve do të diskutohen nga Tuchel përpara ndeshjes së radhës së Anglisë ndaj kampiones së re të botës, Spanjës, në Wembley më 26 shtator. Një raport më i gjerë do t’u paraqitet drejtuesve të Federatës më vonë gjatë vitit. Ndërkohë, Tuchel do të marrë pjesë javën e ardhshme në mbledhjen e grupit këshillimor të performancës së Federatës, ku emra të njohur të sportit dhe biznesit do të kenë mundësinë ta pyesin për turneun.
Në këtë grup bëjnë pjesë legjenda e ragbit, Sir Kevin Sinfield, trajnerja e kombëtares së femrave, Sarina Wiegman, si dhe pronari i Rajasthan Royals në kriket, Manoj Badale. Federata thekson se ky grup është një forum diskutimi dhe jo një gjykatë, por është e pashmangshme që të diskutohet për eliminimin e Anglisë në Botëror, i cili përfundoi me kolapsin e dhimbshëm në gjysmëfinale ndaj Argjentinës.
Në Federatë ekziston bindja se duhet të rindërtohet besimi mes Tuchel dhe lojtarëve të tij. Pas humbjes ndaj Argjentinës, u raportua se futbollistët anglezë ishin të befasuar nga ndryshimet e trajnerit. Tuchel aktivizoi Ezri Konsa, Dan Burn dhe Nico O’Reilly në përpjekje për të mbrojtur avantazhin 1-0, ndërsa shumë lojtarë të Anglisë besonin se Argjentina ishte një kundërshtar që mund të mposhtej.
Në Federatë e pranojnë se mënyra se si erdhi eliminimi në gjysmëfinale ka lënë ende të freskëta emocionet negative te stafi, lojtarët dhe tifozët. Anglia do të përballet me një seri vendimtare prej katër ndeshjesh duke nisur nga fundi i këtij muaji. Pas përballjes me Spanjën, anglezët do të luajnë katër ndeshje të Nations League brenda vetëm 11 ditësh.
Pavarësisht eliminimit, Anglia zhvilloi Botërorin e saj më të mirë që nga viti 1966, duke shënuar gjashtë gola ndaj Francës në ndeshjen për vendin e tretë. Megjithatë, ndjenja e një mundësie të humbur në gjysmëfinalen ndaj Argjentinës mbetet shumë e fortë.
Tuchel dhe stafi i tij kryesor kaluan tri ditë në St George’s Park javën e kaluar duke analizuar turneun. Në grup ishin asistenti Anthony Barry, specialisti i përgatitjes fizike Nico Mayer, trajneri i portierëve Hilário Henrique dhe analisti James Melbourne.
Së bashku me drejtorin teknik të Federatës, John McDermott, ata analizuan vendimet kryesore taktike dhe zgjedhjet e skuadrës. Në fokus ishin edhe vendimet e vetë Tuchel, përfshirë zëvendësimet që ndikuan në tërheqjen e Anglisë në mbrojtje gjatë gjysmëfinales. Anglia pati një qasje të ngjashme edhe në çerekfinale ndaj Norvegjisë. Ndërsa ndaj Meksikës, në fazën e 1/8-ave, ndryshimi në mënyrën e lojës erdhi pasi skuadra mbeti me 10 lojtarë.
Raporti do të përfshijë gjithashtu të dhënat e performancës së Anglisë dhe informacionin që ato ofrojnë mbi qasjen taktike dhe goditjet standarde. Departamenti i performancës do të analizojë gjendjen fizike të lojtarëve, nga kilometrat e përshkuara gjatë ndeshjeve deri te modelet e gjumit, të regjistruara përmes pajisjeve Whoop që futbollistët përdorën gjatë stërvitjeve dhe kohës së lirë.
Në raport do të shqyrtohet edhe zgjedhja e bazës në Kansas City, përgatitjet për turneun dhe organizimi i udhëtimeve. Një nga pyetjet kryesore do të jetë nëse lojtarëve iu shkaktua një ngarkesë e panevojshme për shkak të udhëtimeve të shumta. Anglia përshkoi plot 15,958 milje, më shumë se çdo skuadër tjetër në Botëror. Tuchel pritet gjithashtu të pranojë gabimet e tij. Ka shenja se trajneri gjerman humbi besimin te gatishmëria e skuadrës për të luajtur futboll sulmues, gjë që mund ta ketë shtyrë të adoptojë një qasje më defensive në fazat e fundit të turneut.
Vetëm në pjesën e dytë të ndeshjes me Kroacinë, sfida e parë e Anglisë në Botëror, skuadra luajti në mënyrën sulmuese që Tuchel kishte kërkuar. Në pushim, kur rezultati ishte 2-2, trajneri u kishte thënë lojtarëve se, nëse do të humbnin, duhej ta bënin duke sulmuar dhe jo duke u mbrojtur.
Mark Jarvis, drejtori i performancës së Federatës, do të përgatisë raportin përfundimtar të turneut. Ai do t’u paraqitet privatisht drejtuesve të lartë të FA-së në mesin e muajit të ardhshëm. Raporti do të vlerësojë gjithçka, nga vendimet taktike të Tuchel dhe zgjedhjet e lojtarëve, deri te performanca e skuadrës dhe të dhënat e mbledhura gjatë turneut.
Drejtori i futbollit, Dan Ashworth, tashmë është përgjegjës për kombëtaret angleze në rikthimin e tij të dytë në Federatë. Drejtori ekzekutiv Mark Bullingham dhe John McDermott do të jenë gjithashtu pjesë e drejtuesve që do të shqyrtojnë raportin.
Tuchel deklaroi në tetor 2024 se synonte të vendoste “një yll tjetër” në fanellën e Anglisë. Në atë kohë, kontrata e tij ishte vetëm për Botërorin. Në shkurt, ai nënshkroi një kontratë të re me Federatën që e mban në detyrë deri në Euro 2028, turne që do të zhvillohet në Britani dhe Irlandë. Besimi i Federatës te trajneri gjerman u konfirmua menjëherë pas humbjes në gjysmëfinale ndaj Argjentinës më 15 korrik.
FA vazhdon t’i besojë Tuchel për të fituar Europianin, pas dy finaleve radhazi të humbura nga Anglia nën drejtimin e Gareth Southgate. Një tjetër sfidë për Ashworth do të jetë ringritja e ekipeve të moshave, të cilat gjatë mandatit të tij të mëparshëm në Federatë fituan Botërorë dhe Kampionate Europiane.
Edhe pse U21-shat kanë fituar dy Kampionate Europiane radhazi nën drejtimin e Lee Carsley, në Federatë ekziston ndjesia se ekipet e moshave kanë pësuar rënie. Anglia nuk arriti të kishte asnjë skuadër në finalet e Kampionateve Europiane U17 dhe U19 këtë verë. Gjatë periudhës së pandemisë së Covid-19 pati shkurtime në buxhetet e ekipeve të moshave. Ashworth duhet të vlerësojë nëse Federata mund të rikthejë sot nivelet e mëparshme të stafit teknik dhe mbështetës.
Top Channel
