Të dënuar me vdekje për trazirat gjatë protestës së 8 janarit/ Ekzekutohen me varje dy të rinj në Iran, të cilësuar si ‘agjentë armiqësorë’

Mëngjesin e së dielës, më 19 korrik, autoritetet iraniane ekzekutuan me varje dy të rinj të dënuar me vdekje për pjesëmarrjen në protestat e 8 janarit në sheshin Alikhani, në Isfahan.

Sipas njoftimit të gjyqësorit iranian, të ekzekutuarit janë Erfan Esfandiary, 18 vjeç, dhe Golmohammad Mohammadi, 23 vjeç, shtetas afgan. Ata u shpallën fajtorë për pjesëmarrje në sulme ndaj forcave të rendit, si dhe për shkatërrimin dhe djegien e pronës publike gjatë protestave.

Sipas mediave shtetërore iraniane, protestuesit akuzohen për djegien e ndërtesave, shkatërrimin e tabelave të qytetit, kamerave të sigurisë dhe semaforëve, dëmtimin e pikave të kontrollit dhe stacioneve të policisë, djegien e gomave, bllokimin e rrugëve, sulme ndaj kalimtarëve dhe vandalizimin e xhamive gjatë demonstratave të 8 janarit.

Autoritetet iraniane pretendojnë gjithashtu se pjesëmarrësit në protesta, të cilët i cilësojnë si “agjentë armiqësorë”, ishin të armatosur me armë zjarri, thika, hanxharë dhe molotov. Sipas versionit zyrtar, gjatë përleshjeve me forcat e sigurisë u vranë katër oficerë të zbatimit të ligjit.

Megjithatë, organizatat për të drejtat e njeriut dhe raportime të ndryshme kanë ngritur shqetësime serioze për mënyrën se si u zhvillua procesi gjyqësor. Sipas këtyre raportimeve, procedurat para Degës së Parë të Gjykatës Revolucionare të Isfahanit u kufizuan në vetëm tre seanca dëgjimore, secila me kohëzgjatje rreth një orë. Po ashtu, pretendohet se të pandehurit kishin qasje të kufizuar te avokatët e pavarur dhe se disa prej tyre iu nënshtruan torturave dhe u detyruan të jepnin rrëfime.

Në total, në këtë çështje u gjykuan 59 persona, ndërsa 12 prej tyre u dënuan me vdekje. Pas ekzekutimit të dy të rinjve, 10 të dënuar të tjerë mbeten në pritje të zbatimit të dënimit, duke u përballur me një rrezik të menjëhershëm ekzekutimi.

Top Channel