“U vra për të mbyllur hetimet”/ Investigoi bizneset e familjes së presidentit, gjendet e vdekur në Ekuador aktivistja polake

41-vjeçarja, nënë e dy vajzave të vogla, u gjet më 8 qershor e shtrirë në dysheme me një litar rreth qafës. Fillimisht autoritetet lokale e trajtuan ngjarjen si vetëvrasje, por raporti i autopsisë i kryer në Guayaquil ka zbuluar se shkaku i vdekjes ka qenë goditje në kokë dhe strangulim, duke përjashtuar mundësinë e vetëvrasjes.

Avokatja e të drejtave të njeriut Lita Martínez ka deklaruar se “bazuar në raportet forenzike, jemi të sigurt se bëhet fjalë për një vdekje të dhunshme”, duke hedhur poshtë versionin fillestar zyrtar.

Sipas aktivistëve dhe kolegëve të saj, Silva Koniuszek kishte kaluar vitet e fundit duke denoncuar publikisht krime mjedisore, kapje tokash dhe korrupsion në Ekuador, shpesh në bashkëpunim me gazetarë lokalë. Ajo kishte deklaruar më herët se “nuk duhet të lindësh në Ekuador për ta dashur dhe mbrojtur atë që është e drejtë”.

Miqtë e saj e kanë përshkruar si një nga zërat më të guximshëm kundër korrupsionit, duke thënë se ajo vazhdimisht merrte kërcënime me vdekje, por nuk ndalonte së denoncuari abuzimet.

Sipas kolegëve të saj, ajo kishte nisur hetime ndaj kompanisë Noboa Trading, në pronësi të familjes së presidentit të krahut të djathtë të Ekuadorit Daniel Noboa, duke ngritur akuza për kontrabandë droge dhe korrupsion në zinxhirin e eksporteve të bananeve. Ajo gjithashtu kishte dorëzuar një dosje me pretendime në ambasadën e SHBA në Quito pak para vdekjes së saj.

Raportohet se ajo po hetonte gjithashtu rrjete të dyshuara për trafik toke në provincën Santa Elena dhe lidhje mes zyrtarëve lokalë dhe organizatave kriminale.

Ngjarja ka nxitur reagime edhe në vendin e saj të lindjes, Poloni, ku autoritetet kanë kërkuar hetim të pavarur dhe transparent nga institucionet ekuadoriane. Ambasada polake ka theksuar rëndësinë e mbrojtjes së aktivistëve dhe gazetarëve që denoncojnë korrupsionin dhe krimin e organizuar.

Top Channel