“U vra për të mbyllur hetimet”/ Investigoi bizneset e familjes së presidentit, gjendet e vdekur në Ekuador aktivistja polake 23/06 12:22
Skema e ngjyrave
Madhësia e shkrimit
Një raund tre-ditor negociatash mes Izraelit dhe Libanit nis sot në Uashington, me palën izraelite që paraqet harta dhe një propozim për një plan pilot të tërheqjes së pjesshme nga një zonë e kufizuar në jug të Libanit, sipas mediave izraelite.
Sipas planit në diskutim, Forcat e Mbrojtjes së Izraelit (IDF) do të tërhiqen nga një zonë specifike, e cila besohet se është pastruar kryesisht nga aktivitetet ushtarake, ndërsa ushtria libaneze do të vendoset në këtë territor nën mbikëqyrjen e Shteteve të Bashkuara.
“Ne po vijmë me harta për të përcaktuar se cila do të jetë zona pilot në Liban”, deklaroi një burim izraelit për Channel 12. Sipas tij, projekti pilot ka të bëjë me një zonë në jug të lumit Litani, poshtë të ashtuquajturës “vijë e verdhë”.
Burimet bëjnë të ditur se qeveria izraelite dhe strukturat e sigurisë po përpiqen të krijojnë masa për ndërtimin e besimit mes palëve, me synimin për të shmangur presionet apo ndërhyrjet e jashtme, qoftë nga Shtetet e Bashkuara apo Irani.
Negociatat pritet të përfundojnë të enjten dhe do të zhvillohen në dy grupe pune paralele: një politik dhe një ushtarak.
Grupi politik do të drejtohet nga ambasadori Yechiel Leiter dhe Yossi Dresnin, i dërguari i kryeministrit izraelit dhe zyrtar i lartë në Këshillin e Sigurisë Kombëtare.
Ndërkohë, grupi ushtarak do të udhëhiqet nga kreu i Departamentit të Strategjisë, Michael Levin, së bashku me atasheun ushtarak në detyrë, Arik Ben-Dov.
Sipas burimeve, Izraeli, Libani dhe Shtetet e Bashkuara hyjnë në këto bisedime me pritshmëri të larta për arritjen e rezultateve konkrete.
Ndërkohë, forcat izraelite vijojnë të mbajnë nën kontroll disa pika strategjike ku operacionet ushtarake nuk kanë përfunduar ende, veçanërisht në zonën e Kodrës Ali Taher, në koordinim me Shtetet e Bashkuara.
Në këtë zonë ndodhet një strukturë e madhe nëntokësore që, sipas Izraelit, i përket Hezbollahut. Autoritetet izraelite po shqyrtojnë mënyrat për shkatërrimin e saj pa ndikuar në procesin diplomatik që po zhvillohet paralelisht.
Divizioni i 36-të i ushtrisë izraelite, ku përfshihen Brigada Givati dhe Brigada e 401-të e Blinduar, po operon në terren në kuadër të një misioni kompleks me komponent të theksuar inxhinierik dhe operacional.
Propozimi ushtarak për neutralizimin e objektit nëntokësor pritet t’i paraqitet udhëheqjes politike izraelite, ndërsa vendimi përfundimtar mund të merret gjatë ditëve në vijim.
Top Channel
